ՆախընտրելիԴատախազության ներկայացուցիչները հետաձգել են «Էխո Մոսկվի» ռադիոկայանի գլխավոր խմբագիր Ալեքսեյ Վենեդիկտովի հետ հանդիպումը: Այս մասին Վենեդիկտովը հայտնել է իր միկրոբլոգում:
Հիշեցնենք, որ ավելի վաղ «Էխո»-ի ղեկավարը հայտնել էր, որ դատախազություն էր կանչվել Աշխատանքային օրենսգրքի խախտման տեղեկության առնչությամբ:
Իր կողմից Մոսկովյան դատախազությունը ժխտել է, որ Վենեդիկտվը զրույցի է կանչվել: Վարչությունում հայտնել են, որ ներկայումս իսկապես կատարվում է «Էխո Մոսկվի» ռադիոկայանի ստոգումը կանոնադրության հետ կապված, սակայն գլխավոր խմբագրին դատախազություն ոչ ոք չի կանչել:
«Ինտերֆաքս» գործակալությանը տված հարցազրույցում Վենեդիկտովը պատմել է, որ համաձայն չէ ներկայացված մեղադրանքներին:
«Ես ուզում եմ հիշեցնել, որ մեր խմբագրության կանոնադրությունը մի քանի տարի առաջ հաստատել է տնօրենների խորհուրդը, որի կազմում այն ժամանակ ընդգրկված է եղել Ռուսաստանի բարձրագույն արբիտրաժային դատարանի ներկայիս նախագահ Անտոն Իվանովը: Այդ պատճառով էլ շատ կասկածելի է, որ նա էլ չի նկատել Աշխատանքային օրենսգրքին անհամապատասխանությունը», - նշել է նա:
Ըստ նրա` կանչի պատճառ է դարձել հրատարակության կանոնագրքի այն կետը, որով լրագրողներին արգելվում է քաղաքական կուսակցությունների անդամ դառնալ , գրում է «Կոմսոմոլսկայա պրավդան»:
Մինչդեռ, ինչպես հայտնում է Lenta.ru-ն, «Յաբլոկոյի» ղեկավարութունը մտադիր է կուսակցությունից հեռացնել Ալեքսանդր Ֆիլշերին` Տամբովի այն նույն բնակչին, որը դատախազությանը բողոքել էր «Էխո Մոսկվի» ռադիոկայանի կանոնադրության դեմ: Այս մասին իր թվիթերում հայտնել է կուսակցության առաջնորդ Սերգեյ Միտրոխինը:
Նրա բողոքը որպես սադրանք են դիտարկել, եւ մտադիր են կուսակցությունից հեռացնել «քաղաքական վնասի համար» սահմանումով: Դրան զուգահեռ Վենեդիկտովը «Յաբլոկոյին» խնդրել է չհեռացնել Ֆիլշերին, քանի որ ռադիոկայանը նրա դեմ ոչինչ չունի:
