Մերձավոր Արևելքում ռազմական գործողությունները շարունակվում են՝ սրելով լարվածությունը տարածաշրջանում և առաջացնելով մտահոգություն միջազգային հանրության շրջանում: Երկու կողմերի կողմից իրականացված ռազմական հարվածներն ու պատասխան գործողությունները շարունակում են ազդել ոչ միայն տարածաշրջանի երկրների, այլև համաշխարհային տնտեսական իրավիճակի վրա:

NEWS.am-ը ներկայացնում է երեքշաբթի երեկոյան Մերձավոր Արևելքում տեղի ունեցած հիմնական իրադարձությունների համառոտ ակնարկը

Պատերազմը կշարունակվի մինչև Իրանին չփոխհատուցվեն վնասները և չվերացվեն Իրանի դեմ բոլոր տնտեսական պատժամիջոցները: Ավելին, Իրանը պետք է ստանա իր ներքին գործերին չմիջամտելու միջազգային իրավական երաշխիքներ, հայտարարել է Իրանի գերագույն առաջնորդի ռազմական խորհրդական Մոհսեն Ռեզաին:

Bloomberg-ը հաղորդում է, որ Թրամփը հայտարարել է Իրանի հետ բանակցությունների մեկնարկի մասին այն բանից հետո, երբ դաշնակիցները զգուշացրել են, որ պատերազմը կլինի աղետալի: Դոնալդ Թրամփի որոշումը՝ հրաժարվել Իրանի էներգետիկ ենթակառուցվածքները ոչնչացնելու իր սպառնալիքից, կայացվել է այն բանից հետո, երբ ԱՄՆ դաշնակիցները և Պարսից ծոցի երկրները գաղտնի զգուշացրել են նախագահին իր սպառնալիքը իրականացնելու վտանգների մասին:

Fars լրատվական գործակալությունը հաղորդում է, որ ԱՄՆ-Իսրայելական հարվածի հետևանքով Սպահանում վնասվել են գազի գրասենյակի շենքը և գազի ճնշման կայանը: «Հարձակման թիրախը եղել են Սպահանի Քավեհ փողոցում գտնվող գազի գրասենյակի շենքը և գազի ճնշման կայանը, որի արդյունքում վնասվել են այդ օբյեկտների որոշ հատվածներ և շրջակա շենքերը», - հաղորդում է Telegram ալիքը։

Թրամփի վարչակազմը գնահատում է Իրանի խորհրդարանի խոսնակ Մոհամմադ Բաղեր Ղալիբաֆի հետ համագործակցելու հնարավորությունը: ԱՄՆ-ն նրան դիտարկում է որպես քաղաքական բանակցություններում պոտենցիալ գործընկեր, հաղորդում է Politico-ն՝ հղում անելով պաշտոնյաներին: ԱՄՆ ռազմաօդային ուժերը 12 F-16 կործանիչ ինքնաթիռներից բաղկացած լրացուցիչ էսկադրիլիա են տեղակայել Իսրայելի Օվդա ավիաբազայում, ըստ Ռազմական օդային հետևման դաշինքի (MATA) տվյալների: