Իրանի հետ պատերազմում ԱՄՆ նախագահ Դոնալդ Թրամփը այնքան արագ է տատանվում ռազմատենչ սպառնալիքների և խրախուսական ազդանշանների միջև, որ գրեթե ոչ ոք չի կարողանում հասցնել։ Հարցն այն է, թե իրականում ի՞նչ քայլեր է ձեռնարկում ԱՄՆ-ը պատերազմը դադարեցնելու համար։

Թրամփի քաղաքականության կտրուկ տատանումները համարվում են մինչ այժմ ամենացայտուն ապացույցը, որ նա պատերազմից դուրս գալու ելք է փնտրում, պատերազմ, որն ակնհայտորեն ըստ իր ծրագրի չի ընթանում, գրում է Bild-ը։

Վաշինգտոնը թերագնահատեց Իրանին. Հորմուզի նեղուցով նավթային ուղիները փակելով՝ նրանք առաջացրին համաշխարհային էներգետիկ ճգնաժամ և բորբոքեցին Պարսից ծոցի երկրների միջև վտանգավոր տարածաշրջանային հակամարտությունը։ Իրանական ռեժիմի անխուսափելի փլուզման նշաններ չկան։

ԱՄՆ-ում Թրամփը տնտեսական հետևանքների պատճառով ավելի ու ավելի ճնշման տակ է։ Պատերազմը բնավ ժողովրդականություն չի վայելում. բենզինի գների աճի, ֆոնդային շուկաների անկման և անկայուն տնտեսական ցուցանիշների ֆոնին, ամերիկացիների 92%-ն, ըստ CBS-ի հարցման, ցանկանում է «հնարավորինս շուտ ավարտել պատերազմը»։ Թրամփի վարկանիշը RealClearPolitics-ի տվյալներով՝ հասել է ռեկորդային ցածր մակարդակի՝ 41,6%։

Ամերիկացի քաղաքագետ Սքոթ Էրբը Թրամփի հակասական հայտարարությունները համարում է «ռազմավարական հուսահատություն»։ Նախագահը սպասում էր արագ և հեշտ ռազմական գործողության. «Նա խիստ սխալվել է, և հիմա ելք է փնտրում՝ չցանկանալով պարտվածի տեսք ունենալ»։

Սակայն ինչպիսի՞ն կարող է լինել այս հակամարտությունից ԱՄՆ-ի դուրս գալը։ Այժմ ուշադրության կենտրոնում են Իրանի միջուկային ծրագրի վերաբերյալ նոր համաձայնագիրը և Հորմուզի նեղուցում անվտանգության երաշխիքները՝ նավթի երկարաժամկետ մատակարարումները պաշտպանելու համար։

Ընդսմին, ներկայիս պայմաններում համաձայնագիրը, հավանաբար, կներկայացվի որպես ԱՄՆ-ին հասցված վնասը նվազագույնի հասցնելու փորձ։ Ամերիկացի փորձագետ Ջոնաթան Քրիստոլը մեկ այլ սցենար է առաջարկում. «Դատելով Թրամփի խոսելաձևից, տպավորություն ես ստանում, թե նա ցանկանում է հայտարարել հաղթանակի մասին և պարզապես հեռանալ»,- հայտարարել է փորձագետը։

Այսինքն՝ միանգամայն հնարավոր է, որ Թրամփը պարզապես գործողությունը կհայտարարի հաջողված, քանի որ, ըստ նրա, ռմբակոծվել է 9000 թիրախ, և Իրանի ռազմական ներուժը «բավարար չափով ոչնչացվել է»։