Ընտրություններում «Քաղաքացիական պայմանագիր» (ՔՊ) կուսակցության հաղթանակի և Փաշինյանի վերընտրվելու դեպքում Հայաստանին նոր պատերազմ կսպառնա։ Այս մասին մարտի 24-ին կայացած մամուլի ասուլիսի ժամանակ հայտարարել է Հայաստանի նախկին օմբուդսմեն, «Միասնության թևեր» քաղաքական նախաձեռնության ղեկավար Արման Թաթոյանը։

Ըստ նրա՝ Փաշինյանի սպառնալիքները՝ կապված իր պարտության դեպքում պատերազմի անխուսափելիության հետ, պետք է ուսումնասիրվեն իրավապահների կողմից, քանի որ դրանք հակասում են ՀՀ շահերին, իսկ ագրեսիայի դեպքում կօգնեն Ադրբեջանին

Թաթոյանը նշել է, որ Փաշինյանը «խաղում է» մարդկանց վախերի վրա։ «Բայց այլ հարց է, որ Փաշինյանը չի էլ մտածում մայրերի և նրանց վախերի մասին. նա միայն գիտի, որ վախեր կան, և որպես գործիք է օգտագործում դրանք ընտրություններից առաջ, որպեսզի ստիպի մարդկանց մտածել, թե ելք չկա և ոչինչ փոխել հնարավոր չէ։ Փաշինյանի կուսակցությունը հենց պատերազմի կուսակցությունն է։ Նրա վերընտրվելու դեպքում Հայաստանին իրական պատերազմ է սպառնում։ Փաշինյանն ու «ՔՊ»-ն կամ չեն հասկանում, կամ հասկանալով՝ միտումնավոր են վարվում. Ադրբեջանին արվող մշտական զիջումները բաց հրավեր են՝ առաջ գնալու, ավելին պահանջելու համար, առավել ևս, եթե միջազգային հանրությունից թաքցվում է ճշմարտությունը, ինչպես դա անում են ՀՀ իշխանությունները։ Նրանք չեն հավատում ժողովրդի ուժին և անում են ամեն ինչ այն է՛լ ավելի թուլացնելու համար՝ սեփական պարտվողական հոգեբանության պատճառով», - ընդգծել է Թաթոյանը: 

Արման Թաթոյանը միաժամանակ Հայաստանի երկրորդ նախագահ Ռոբերտ Քոչարյանին կոչ է արել հետևել առաջին և երրորդ նախագահների օրինակին և հրաժարվել ընտրություններին մասնակցելուց: Նրա կարծիքով՝ Ռոբերտ Քոչարյանի մասնակցությունը, որին մերժում է ընտրողների մի մասը, միայն վստահություն և լեգիտիմություն կհաղորդի Փաշինյանին:

Պատերազմի թեման Փաշինյանը բարձրացրել է նաև Քոչարյանի հայտարարության պատճառով, ըստ որի ԹՐԻՓ-ը լուրջ սպառնալիք կլինի Հայաստանի համար, կարծում է Թաթոյանը։ «Երկրորդ նախագահի մասնակցությունն ինձ համար հարցեր է առաջացնում. կամ դա բիզնեսը պաշտպանելու համար է, կամ Փաշինյանի նախագահության ընթացքում ընդդիմության մաս կազմելու համար, կամ երկուսն էլ։ Դա խոչընդոտում է Փաշինյանի վերընտրությունը կանխելու կոլեկտիվ ջանքերին»,- հայտարարել է Թաթոյանը։ Ընդհանուր առմամբ, Փաշինյանը, վամպիրի պես սնվում է անցյալ տարիների ձախողումներով և դա անում է անհատականացված ձևով, հավելել է Թաթոյանը։