նախընտրելի դարձնել
Բրազիլիայի արտգործնախարար Մաուրո Վիեյրան խստորեն դատապարտել է Իրանի դեմ ԱՄՆ-ի և Իսրայելի ռազմական ագրեսիան՝ ցավակցություն հայտնելով Իրանի գերագույն առաջնորդ այաթոլլահ Սեյեդ Ալի Խամենեիի, պաշտոնատար անձանց և քաղաքացիների մահվան կապակցությամբ, հաղորդում է Press TV-ն։
Վիեյրան հինգշաբթի իր իրանցի գործընկեր Աբբաս Արաղչիի հետ քննարկել է Արևմտյան Ասիայի տարածաշրջանում տեղի ունեցող զարգացումները՝ կենտրոնանալով Իրանի դեմ ԱՄՆ-ի և Իսրայելի իրականացրած ռազմարշավի հետևանքների վրա։ Վիեյրան համերաշխություն է հայտնել Իրանի կառավարությանը և ժողովրդին։ Արաղչին մանրամասն ներկայացրել է ԱՄՆ-ի և Իսրայելի գործողությունների մասշտաբները՝ ընդգծելով, որ Իրանի դեմ ռազմական հարձակումը սկսվել է շարունակական դիվանագիտական ջանքերի ֆոնին։
Նա վերահաստատել է իր ազգային ինքնիշխանությունը և տարածքային ամբողջականությունը պաշտպանելու Իրանի անսասան հանձնառությունը մինչև իր նպատակների լիակատար իրականացումը և ագրեսորների զղջումը։ Արաղչին ընդգծել է, որ ԱՄՆ-ն ու Իսրայելն այս պարտադրված պատերազմի հրահրիչներն են՝ հավելելով, որ Իրանի պաշտպանական գործողություններն ագրեսորների ռազմաբազաների և օբյեկտների դեմ տարածաշրջանում ինքնապաշտպանության իր անբաժանելի իրավունքի մասն են կազմում։ Նա ընդգծել է, որ այդ գործողությունները չպետք է դիտարկվեն որպես ընդունող երկրների ինքնիշխանության խախտում։
Բացի դրանից, Արաղչին հայտարարել է, որ տարածաշրջանային երկրները, ըստ միջազգային իրավունքի և բարիդրացիության սկզբունքների, պարտավոր են կանխել Իրանի դեմ իրենց տարածքի և ռեսուրսների օգտագործումը ԱՄՆ-ի և Իսրայելի ագրեսիվ գործողություններ իրականացնելու համար։ Նա զգուշացրել է, որ այդ հարցում ցանկացած անփութություն կհանգեցնի միջազգային պատասխանատվության և կարող է լուրջ հետևանքներ ունենալ տարածաշրջանային խաղաղության և կայունության համար։
«Բրազիլիայի արտգործնախարարը, խորապես մտահոգված լինելով իրավական խախտումներով և միջազգային նորմերի ոտնահարմամբ, կրկին շեշտել է ազգային ինքնիշխանությունը, տարածքային ամբողջականությունը և միջազգային իրավունքի հիմնարար սկզբունքները հարգելու անհրաժեշտությունը»,- գրում է իրանական լրատվամիջոցը։
Իր հերթին, Արաղչին քննադատել է միջազգային իրավունքի ընտրողական կիրառումը՝ հայտարարելով, որ Իսրայելի գործողություններն անտեսվում են, մինչդեռ Իրանի պաշտպանական միջոցառումները դատապարտվում են։
