ԱՄՆ-ի և Իրանի միջև պատերազմն ավելի երկար կտևի, քան որևէ մեկն ակնկալում էր. Politico-ին տված հարցազրույցում հայտարարել է Պետդեպարտամենտի նախկին ներկայացուցիչ և Ջո Բայդենի վարչակազմում Ազգային անվտանգության խորհրդի՝ Իրանի հարցերով տնօրեն Նեյթ Սվենսոնը։

Ըստ Սվենսոնի, պատճառը երկու կողմի՝ թե՛ Վաշինգտոնի, թե՛ Թեհրանի, «սեփական իրավացիության նկատմամբ իռացիոնալ վստահությունն է», ինչը որոշակի մտահոգություն է առաջացնում։

«Թրամփը շարունակում է հավատալ, որ ռազմական հաջողությունը հանգեցնում է Իրանի քաղաքական կապիտուլյացիային, ինչը տեղի չի ունենում։ Հիշենք, որ Իրանը ձայնի իրավունք ունի և վճռական է տրամադրված դիմադրելու ու սպասելիքները չարդարացնելու հարցում։ Կարծում եմ նաև, որ նրանք որոշ չափով իռացիոնալ ինքնավստահություն ունեն, նույնիսկ եթե ելք չունեն։ Կարծում եմ՝ մենք այս հակամարտության մեջ կմնանք ավելի երկար, և, հավանաբար, դրա էսկալացիան կշարունակվի»,- ասել է փորձագետը։

Ըստ Պետդեպարտամենտի նախկին ներկայացուցչի, հավանական է, որ ԱՄՆ-ն կիրականացնի որոշ ցամաքային գործողություններ, որոնք այժմ դիտարկում է ԱՄՆ նախագահ Դոնալդ Թրամփը։ Սվենսոնն ընդգծել է, որ Իրանն իրեն վստահ է զգում։

«Նրանք համարում են, որ պահանջներ պետք է ներկայացնեն իրենք, այլ ոչ թե ԱՄՆ-ն, և ակնհայտ է, որ ԱՄՆ-ն դրան չի հետևում։ Ուստի չեմ կարծում, որ որևէ կողմ պատրաստ է փոխզիջման»,- նշել է փորձագետը։

Ըստ Սվենսոնի, հունիսյան պատերազմը հանգեցրեց Իրանի դիրքորոշման խստացմանը։

«Մինչև այդ նրանք չգիտեին՝ ինչ անել Թրամփի հետ։ Կարծում եմ՝ նրանք դարձել են ավելի անզիջում և պակաս ճկուն։ Ուստի լուրջ մասնակցություն չեն ցուցաբերել, դա ավելի շատ հանրության համար խաղ է, քան լրջություն։ Ահա թե ինչում է Իրանը խիստ փոխվել անցյալ տարվա հունիսից։ ԱՄՆ-ում, կարծում եմ, տեղաշարժն ավելի վաղ է եղել։ Կարծում եմ՝ նրանք չգիտեին՝ ինչ են ուզում գործարքից, և ԱՄՆ-ն այս հարցում սկսեց ավելի շատ ապավինել մեր ներքին քաղաքականությանը և լսել արտաքին ազդեցություններին, ուստի՝ ոչ մի հարստացում և այլն»,- ընդգծել է փորձագետը։

Նա նշել է, որ Իրանը չի պատրաստվում կապիտուլյացիայի ենթարկվել, այնպես որ համաձայնագիրը միակողմանիորեն չեղարկելու գաղափարը չի իրականանա։ «Կա՛մ պետք է գնալ էսկալացիայի, կա՛մ փոխզիջման։ Սրանք միակ տարբերակներն են»,- ասել է նա։

Ըստ փորձագետի, դեէսկալացիային Թրամփի համաձայնելու հավանականությունը կարող է ի վերջո կախված լինել շուկայական իրավիճակից։

«Կարծես սա միակ ցուցանիշն է, որը նրան հուզում է։ Այնպես որ, ամեն ինչ կախված է տնտեսական խնդիրների լրջությունից»,- ասել է Սվենսոնը։