Պենտագոնը Մերձավոր Արևելք է տեղակայել մի քանի հարյուր հատուկ նշանակության ուժեր, հաղորդում է The New York Times-ը՝ հղում անելով երկու ամերիկացի զինվորական պաշտոնյաների։

Նրանց խոսքով՝ այս ուժերը կմիանան ծովային հետևակայիններին և դեսանտայիններին, որոնք նույնպես տեղակայվել են տարածաշրջանում՝ ԱՄՆ նախագահ Դոնալդ Թրամփին Իրանի դեմ ռազմական արշավ անցկացնելու լրացուցիչ հնարավորություններ տրամադրելու համար։

Պաշտոնյաները պարզաբանել են, որ հատուկ նշանակության ուժերին, այդ թվում՝ Army Rangers-ին և Navy SEAL-ին, դեռևս կոնկրետ առաջադրանքներ չեն տրվել։

Թերթի աղբյուրները կարծում են, որ հատուկ նշանակության ուժերը կարող են տեղակայվել Հորմուզի նեղուցը պաշտպանելու համար, որը Իրանը փաստացի փակել է, կամ որպես Խարգ կղզին՝ Իրանի նավթային կենտրոնը Պարսից ծոցի հյուսիսում, գրավելու գործողության մաս։ Ավելին, դրանք կարող են օգտագործվել Իրանի Սպահանի միջուկային օբյեկտից բարձր հարստացված ուրանը գրավելու գործողություն իրականացնելու համար։

Հրապարակման մեջ նշվում է, որ հատուկ նշանակության ուժերը կմիանան 2500 ծովային հետևակայիններին, որոնք անցյալ ուրբաթ ժամանել էին տարածաշրջան՝ դեսանտային նավերով։ 31-րդ ծովային հետևակի արշավախմբային գումարտակին տրված ճշգրիտ առաքելությունները նույնպես դեռևս պարզ չեն, սակայն ԱՄՆ պաշտոնյաները նշում են, որ Թրամփը քննարկում է Հորմուզի նեղուցը բացելու ուղիները։

Հրապարակումը նշում է, որ անցյալ շաբաթ Պենտագոնը նաև Մերձավոր Արևելք է տեղակայել մոտ 2000 զինվորի 82-րդ օդադեսանտային դիվիզիայից։

Զինվորական պաշտոնյայի խոսքով՝ բանակի դեսանտայինների գտնվելու վայրը չի բացահայտվում։ Այնուամենայնիվ, նրանք կլինեն Իրանի հասանելիության սահմաններում։ Դեսանտայիններ կարող են տեղակայվել նաև Խարգ կղզին գրավելու համար, որտեղ ամերիկյան ռազմական ինքնաթիռները վերջերս ավիահարվածներ են հասցրել՝ հարվածելով ավելի քան 90 ռազմական օբյեկտների։ Ավելին, դեսանտայինները կարող են օգտագործվել այլ ցամաքային գործողություններում՝ ծովային հետևակի և հատուկ նշանակության ուժերի հետ միասին։