Երեւանի «Վարդանանց» նորարարական բժշկության կենտրոնի հեռահար բժշկության ծրագրի միջոցով վերջին երեք տարիներին մի քանի տասնյակ հիվանդների մոտ կտրուկ փոխվել, շտկվել է հիվանդության բուժման գործընթացը՝ արտերկրի մասնագետներից խորհրդատվություն ստանալու արդյունքում: Այս մասին Հայաստանում հեռահար բժշկության ասոցիացիայի կազմակերպած սեմինարին ասաց «Վարդանանց» ԲԿ տնօրեն Հարություն Մանգոյանը, որի ղեկավարած բժշկական կենտրոնն արդեն երեք տարի է՝ համագործակցում է Գերմանիայի Ֆրայբուրգ քաղաքի առաջատար համալսարանական կլինիկայի հետ:

«Արդեն 54 վիդեո կոնֆերանս ենք կազմակերպել հիվանդների եւ Գերմանիայի առաջատար մասնագետների միջեւ հեռահար խորհրդատվություն ստանալու համար, 11 հիվանդի համար երկրորդ կարծիքի տրամադրում ենք ապահովել, 4 հիվանդի համար բուժում ենք կազմակերպել Գերմանիայում»,- ներկայացրեց տնօրենը:

Նրա խոսքով՝ գերմանացի մասնագետների խորհրդատվության շնորհիվ փոխվել է 54 հիվանդից 80 տոկոսի բուժման ընթացքը՝ ապահովելով դրական ելքի ավելի մեծ հավանականություն:

«Եթե խորհրդատվություն չստանային, բուժումը եւ հիվանդության ելքը բոլորովին ուրիշ ճանապարհով կգնային: Նրանք ստանում էին ինչ-որ բուժում, պարզվեց, որ պետք է այլ բան ստանալ: Մարդիկ, որոնք կասկածում էին՝ այս կամ այն ախտորոշիչ միջոցառումը անհրաժեշտ է, թե ոչ, հստակ պատասխան էին ստանում հեռահար խորհրդատվության միջոցով: Դա ես համարում եմ արժեքավոր ձեռքբերում»,- NEWS.am-ի հետ զրույցում ասաց Հարություն Մանգոյանը:

Հեռահար բժշկության ծրագիրը 2005թ. հիմնված բժշկական կենտրոնում գործում է 2011-ից.: Բժշկական կենտրոնը հեռահար բժշկության ծրագրից բացի ամբուլատոր ծառայություններ է տրամադրում՝ 50-ից ավելի բժիշկների կազմով։

«Բոլոր այն հիվանդությունները, որոնք չեն պահանջում հոսպիտալիզացիա, դրանց ախտորոշումը եւ բուժումն անցկացվում է մեր կենտրոնում: Մենք ստեղծել ենք փակ սպասարկման ցիկլ, երբ մարդ, սկսած գանգատից մինչեւ ապաքինում, ամեն ինչ կարողանում է անցնել մեզ մոտ: Մեր կենտրոնի նորարարությունը միայն գործիքները չեն, մեր մեթոդաբանությունն է ուրիշ՝ ախտորոշումից սկսած, վերաբերմունքով վերջացրած»,- ասաց Հարություն Մանգոյանը։

Նշենք, որ սեմինարին մասնակցում էին նաեւ հեռահար բժշկության ոլորտի մասնագետներ Գերմանիայից: Մասնակիցները հանդես եկան զեկույցներով՝ հեռահար բժշկության վերաբերյալ: