Արցախյան գոյամարտում անհետ կորած ազատամարտիկների թիվը հասնում է 1000-ի, որոնցից 94-ի հնարավոր գերության մասին տվյալներ կան, եւ աշխատանքներ են իրականացվում նրանց վերադարձնելու ուղղությամբ։ Այս մասին այսօր`փետրվարի 23-ին, լրագրողներ հետ զրույցում ասաց «Անհայտ կորած ազատամարտիկների խորհուրդ» հ/կ նախագահ, Գերիների, պատանդների և անհայտ կորածների հարցերով հանձնաժողովի անդամ Ռիմա Առաքելյանը` ավելացնելով, որ Ադրբեջանում գործող համանման հանձնաժողովը հայկական կողմի հետ համագործակցելու կամք չի դրսեւորում:
«94 հոգի հնարավոր գտնվածների մասին տեղեկություն կա, բայց հակառակորդի ոչ բարի կամքի դրսեւորման պատճառով մենք չենք կարողանում նրանց վերադարձնել: Հանձնաժողովին կից գործում է աշխատանքային խումբ, որը հայտնաբերման եւ տեղափոխման աշխատանքներ է տանում: Սակայն այդ 94-ի մասին որեւէ հստակ տվյալներ չկան: Մենք դեռ չենք կարողանում Ադրբեջանի հետ լեզու գտնել ոչ մի ձեւ: Հանձնաժողովը փորձում է Ադրբեջանում գործող համանաման հանձնաժողովի հետ աշխատել, բայց հնարավոր չէ նրանց հետ աշխատել»,-ասաց Ռիմա Առաքելյանը:
Ռիմա Առաքելյանի խոսքով` գերիներին վերադարձնելու միակ միջնորդը մնում է «Կարմիր Խաչը», որն էլ, ըստ նրա, շռայլ չէ իր խոստումներում:
«Կարմիր Խաչը խոստացել է օգնել, հույս ունենք, որ կօգնի, բայց նրանք մինչեւ գագաթնակետին չեն հասցնում, ոչինչ չեն անում»,- ասաց Առաքելյանը:
Անհետ կորած ազատամարտիկի մայր Սամարա Գրիգորյանը հույս հայտնեց, որ պետությունը կվերադարձնի բոլոր գերրիներին, կամ գոնե նրանց աճյունները:
«Հնարավոր չէ, որ որեւիցե հերոս կենդանի չլինի: Մենք հուսով ենք, որ գոնե մեկը կգա: Թող ովքեր կենդանի են, նրանց վերադարձնեն, ովքեր չկան, գոնե աճյունները բերեն»,- ասաց Սամարա Գրիգորյանը:
Նշենք, որ հունիսի 29-ը Հայաստանում պաշտոնապես նշվում է որպես անհետ կորած ազատամարտիկի օր: Արցախյան պատերազմի ժամանակ հենց այդ օրն է Մարտակերտի մոտակայքում անհետ կորել առավել մեծ թվով` 75 ազատամարտիկ «Արաբո» ջոկատից։