Ղարաբաղա-ադրբեջանական զորքերի շփման գծում մարտի 19-ին հակառակորդի հատուկ նշանակության ջոկատի ուժեղացված խմբի հարձակումը հետ մղելիս վիրավորված երկու զինծառայողները դեռեւս գտնվում են Ստեփանակերտի զինվորական հոսպիտալում, նրան վիճակը ծայրահեղ ծանր է, դրական դինամիկա դեռեւս չի նկատվում։ Այս մասին NEWS.am-ի թղթակցի հետ զրույցում նշեցին ՀՀ կենտրոնական զինվորական կլինիկական հոսպիտալից։
Նրանց փոխանցմամբ Երեւանում գտնվող զինծառայողների վիճակը ծանր է, սակայն՝ կայուն, նրանց մոտ դրական դինամիկա է նկատվում։
Հիշեցնենք, որ մարտի 19-ին՝ ժամը 08:30-ի սահմանում, հակառակորդի հատուկ նշանակության ջոկատի ուժեղացված խումբը հարձակում է ձեռնարկել հյուսիսային (Գյուլիստանի) ուղղությամբ տեղակայված դիրքերի վրա: Շուրջ երկու ժամ տեւած մարտական գործողության արդյունքում դիրքապահ անձնակազմը եւ օգնության հասած ուժերը ստիպել են հակառակորդին մատնվել փախուստի, այնուհետեւ հետապնդելով վերջիններիս, ամբողջությամբ ոչնչացրել են խմբին` իրենց դիրքերի մատույցներում:
Ցավոք, հակառակորդին դիմագրավելու ժամանակ արիաբար զոհվել են ՊԲ զինծառայողներ Հակոբ Գագիկի Խաչատրյանը (1996թ.), Էդուարդ Գագիկի Հայրապետյանը (1995թ.) եւ Արշակ Կարենի Հարությունյանը (1995թ.), Պաշտպանության բանակի եւս 4 զինծառայողներ վիրավորվել են: