Երեւանում այսօր՝ օգոստոսի 25-ին, մեկնարկել է «Ժողովրդավարություն՝ իրավունքի միջոցով» եվրոպական հանձնաժողովի (Վենետիկի հանձնաժողով) ներկայացուցիչների հանդիպումը ՀՀ կուսակցությունների ներկայացուցիչների հետ՝ քննարկելու ՀՀ սահմանադրության նոր նախագիծը:
NEWS.am-ի թղթակիցը հաղորդում է, որ հանդիպումը տեւելու է երկու ժամ, որի ընթացքում քաղաքական ուժերի ներկայացուցիչները հնարավորություն կստանան հարցեր ուղղել հանձնաժողովի անդամներին: Հանդիպմանը ներկա են խորհրդարանական բոլոր ուժերը:
Հանձնաժողովի անդամներն իրենց ելույթի մեկնարկին հայտարարեցին, որ իրենք ընդամենը կարծիք են հայտնում, եւ հայ ժողովուրդն է որոշելու՝ փոխել Սահմանադրությունը, թե ոչ:
Երեկ Վենետիկի հանձնաժողովի ներկայացուցիչները հանդիպել են ՀՀ նախագահ Սերժ Սարգսյանի հետ, որի ընթացքում շեշտվել է, որ քննարկվող սահմանադրության նախագծի կապակցությամբ սկզբունքային տարաձայնություններ չկան:
Մտքեր են փոխանակվել ժամանակակից սահմանադրական զարգացումների, ինչպես նաեւ Հայաստանի Հանրապետության Սահմանադրության փոփոխությունների նախագծում տեղ գտած ժողովրդավարական նորամուծությունների կապակցությամբ:
