Լեռնային Ղարաբաղի եւ Ադրբեջանի զինված ուժերի շփման գծում զոհվածների մարմինների որոնման եւ դուրս բերման աշխատանքները կշարունակվեն եւս 2-3 օր: Այս մասին NEWS.am-ի թղթակցին տեղեկացրեց ԼՂՀ նախագահի մամուլի քարտուղար Դավիթ Բաբայանը:
Նրա խոսքով, եթե ադրբեջանական կողմը որեւէ խոչընդոտ չհարուցի, նշված գործընթացը կավարտվի 2-3 օրում: Դավիթ Բաբայանը նշեց նաեւ, որ հայկական կողմին է վերադարձվել ԼՂՀ ՊԲ գլխատված զինծառայող Քյարամ Սլոյանի գլուխը: Նրա տեղեկացմամբ, ադրբեջանցիները, որոնց թվում նաեւ թուրքական ահաբեկիչներ են եղել, գլուխը տարել են գյուղից գյուղ եւ բղավել, որ սա եզդի ժողովրդի ցեղասպանության շարունակությունն է, եւ որ նույնը կկրկնվի նաեւ քուրդ ժողովրդի հետ, եթե նրանք համարձակվեն հարձակվել թուրք ժողովրդի վրա:
Ըստ Դավիթ Բաբայանի, հայկական կողմը հակառակորդին է փոխանցել ադրբեջանցի 7 զինծառայողի դիակները:
Ավելի վաղ ԼՂՀ ՊԲ մամուլի ծառայությունը հաղորդել էր, որ ԼՂՀ-ի եւ Ադրբեջանի զինված ուժերի շփման գծում որոնողական աշխատանքների արդյունքում հայտնաբերվել են Պաշտպանության բանակի երկու զինծառայողների մարմինները. կրտսեր սերժանտ Ռոբերտ Ալեքսանդրի Աբաջյանի (ծնվ. 1996 թ.) եւ Անդրանիկ Ատոմի Զոհրաբյանի (ծնվ. 1996 թ.):