Ֆրանսիացի լրագրողը երեք ամսով անդամագրվել է ապագա ջիհադիստների արմատական բջիջում եւ թաքնված տեսախցիկով նկարահանել, թե ինչպես նրանք ահաբեկչություն ծրագրում Ֆրանսիայում «Իսլամական պետություն» խմբավորման անունից, հաղորդում է «ՌԻԱ Նովոստին»:
Օգտագործելով Սայիդ Ռամզի ծածկանունը, նա հետաքննություն է իրականացրել «Ալլահի զինվորները» վավերագրական ֆիլմի համար, որը պետք է պատմի, թե ովքեր են երիտասարդ ջիհադիստները: Ֆիլմի ցուցադրությունը կլինի այսօր՝ մայիսի 2-ին:
«Իմ նպատակն էր հասկանալ՝ ինչ է կատարվում նրանց գլխում»,-նշել է լրագրողը «Ֆրանս Փրեսին»:
«Գլխավոր դասերից մեկն այն է, որ նրանց գործողություններում երբեք չէր նկատվում իսլամի նշաններ: Չկար աշխարհը դեպի լավը փոխելու ցանկություն, միայն կորած, ինքնասպանության հակումներով, հեշտությամբ մանիպուլացման ենթակա երիտասարդներ»,-ասել է Ռամզին:
Նա հայտնել է, որ արմատականների հետ շփման մեջ մտնելը շատ հեշտ էր՝ սոցիալական ցանցերի միջոցով: Դրանից հետո նա միշտ գտնվել է ծայրահեղականների ճամբարում: Մի անգամ մի կին իրեն նամակ է հանձնել, որտեղ նկարագրված էր, թե ինչպես պետք է իրականացնել հարձակում գիշերային ակումբի վրա:
Նախքան այդ պլանի իրագործումը, ոստիկանները ձերբակալել են խմբի անդամներին:
