Քառօրյա պատերազմում զոհված պայմանագրային զինծառայող, 30-ամյա մարտակերտցի Գեղամ Մկրտչյանը չգիտեր, որ առաջնեկի է սպասում: 

«6 ամիս առաջ էինք ամուսնացել: Իր զոհվելուց հետո ես վատացա, ինձ տարան հիվանդանոց, իմացա, որ առաջնեկիս եմ սպասում»,- NEWS.am-ին պատմեց Գեղամի զինծառայող կինը՝ Անուշ Հյուսնունցը, որն այսօր՝ մայիսի 28-ին, ՀՀ նախագահական նստավայրում էր՝ ստանալու ամուսնուն հետմահու շնորհված «Արիության մեդալը»:

Գեղամն ու Անուշը ծանոթացել են ծառայության ընթացում:

Անուշն ամուսնուն վերջին անգամ տեսել է ապրիլի 1-ի կեսօրին:

«Ես հերթապահության էի, ինքը եկավ ինձ մոտ, խոսեցինք, գնաց: Երեկոյան զանգեց, ասեց, որ պիտի գնան առաջնագիծ: Դրանից հետո զրույցել եմ իր հետ ամսի 3-ի առավոտյան: Իմ մասին էր մտածում, ասում էր՝ դուրս չգաս, մի վախեցի, ամեն ինչ լավ կլինի»,- պատմեց Անուշը՝ նշելով, որ ամուսնու զոհվելու մասին իրեն ասել են հաջորդ օրը՝ ապրիլի 4-ին. «Ինձ ասացին, որ վիրավոր է, բայց փաստորեն մահացել էր, հաջորդ օրն իմացա»:

Գեղամը մեծ նպատակներ ուներ կապված ընտանիքի ապագայի հետ: Անուշը որոշել է՝ եթե որդի ունենա, ամուսնու անունով է կոչելու:

Գեղամ Մկրտչյանը զոհվել է ապրիլի 3-ին Թալիշի դիրքերում: