Սյունիքի մարզի Սառնակունք գյուղի գյուղապետի 22-ամյա որդին ջրամբարում հունիսի 4-ին խեղդվել է իր բարեկամ տղային օգնելիս: NEWS.am-ի հետ զրույցում Սառնակունքի գյուղապետ Մանուչար Մկրտչյանը նշեց, որ իր որդին եւ հորաքրոջ 26-ամյա թոռը ջրամբարի մոտ նստած հաց ուտելիս են եղել, երբ ջրամբարի ափին նկատել են նավակ եւ որոշել են նկարվել նավակի մոտ. «Նստած հաց են կերել, նկատել են նավակը եւ որոշել են նկարվել նավակի մոտ: Հագուստով մոտեցել են նավակին, իմացել են խորը չէ, պարզվել է, որ խորն է, ու միանգամից խորության մեջ են հայտնվել: Որդիս լողալ է իմացել, իսկ ընկերը չէ` օգնել է նրան դուրս է եկել, իսկ ինքը չի կարողացել դուրս գալ` խեղդվել է»,-ասաց գյուղապետը:
Ավելի վաղ տեղեկացրել էինք, որ Սյունիքի մարզի Սառնակունք գյուղում հունիսի 4-ին Սպանդարյանի ջրամբարում խեղդվել է 22-ամյա երիտասարդ, ավելի ուշ պարզվել էր, որ խեղդվողը գյուղապետի տղան է եղել:
