Եգիպտոսի դատախազությունը «Մահմեդական եղբայրների» հոգեւոր առաջնորդ Մուհամեդ Բադիային եւ շարժման մի քանի այլ առաջնորդների, մասնավորապես՝ գլխավոր խորհրդականի տեղակալ Մահմուդ Էզատին, Մոհամեդ էլ Բալթաջիին եւ Էսամ էլ Էրիանին  կալանավորելու հրահանգ է ստորագրել, գրում է rbc-ն: Նրանց մեղադրում են սադրանքների  մեջ, որոնց հետեւանքով հուլիսի 8-ին Կահիրեում 55 մարդ է զոհվել:

Իր հերթին «Մահմեդական եղբայրների»  ներկայացուցիչը հայտնել է, որ դեռ ոչ ոքի չեն բանտարկել: Ըստ նրա՝  դատախազության այդ որոշումն ուղղված է Կահիրեի հյուսիս-արեւելքում շարժման կողմնակիցների ցույցը դադարեցնելուն, վերջիններս պահանջում են պաշտոնին վերադարձնել նախագահ Մուհամեդ Մուրսիին, նշում է «Ինտերֆաքսը»:

Մուրսին ներկայումս ապահով վայրում է: Այդ մասին հայտնել են երկրի ԱԳՆ-ի ներկայացուցիչները: Ըստ նրանց՝ նրա նկատմամբ ոչ մի դատավարություն չի տարվում եւ  պաշտոնական մեղադրանք դեռ չեն ներկայացրել:

Ավելի վաղ արդեն կալանավորվել էին կազմակերպության քաղաքական թեւի առաջնորդ Սայադ Էլ Քաթաթնին, ինչպես նաեւ նրա տեղակալներից մեկը՝ Ռաշադ ալ Բաումին: