Կարեն Դեմիրճյանի անվան մարզահամերգային համալիրը՝ պաշտպանության նախարարության հանձնելու մասին որոշումը համալիրի համասեփականատեր եւ տնօրեն Բորիս Մուրադյանի համար նորություն չէ: NEWS.am-ի հետ զրույցում Մուրադյանը պնդեց, որ կառավարությունն անօրինական որոշում է կայացրել:
«Ցանկացած որոշում անօրինական է. պատմամշակութային արժեքը չի կարող լինել պաշտպանության նախարարության հաշվեկշռում, քանի որ հենց այդ նախարարության կանոնադրությամբ նման բան չի թույլատրվում: Մենք վարկ չենք ստացել, բայց պարտավորություն ենք վերցրել, որ այդ վարկը մուծենք, եւ ահա իշխանությունները դիմում են այդպիսի ռադիկալ քայլերի: Եթե պետական վարկերը չեն ցանկանում երկարաձգել, ուրեմն միտում կա: Մենք անպայման դիմելու ենք դատարան եւ բողոքարկելու վճիռը»,- ասաց նա:
Բորիս Մուրադյանի խոսքով՝ այս պահին համալիրում են գտնվում ռազմական ոստիկանության եւ ԴԱՀԿ աշխատակիցները, որոնք անօրինական ձեւով սարքավորումներ են յուրացնում:
Նշենք, որ կառավարության օգոստոսի 20-ին կայացած նիստի ժամանակ ֆինանսների փոխնախարար Պավել Սաֆարյանը հայտնել է, որ առաջարկը եղել է ԴԱՀԿ-ի կողմից: Նրա խոսքով՝ որ վարկային պարտքը կազմում է 10 մլրդ 207 մլն է, սակայն դրանից բացի առկա են նաև այլ պարտքեր՝ 204 մլն դրամ պետական տուրք: Այսինքն ընդհանուր առմամբ պարտքը կազմում է ավելի քան 10 մլրդ 400 մլն դրամ:
Հիշեցնենք, որ մայիսից ԴԱՀԿ-ն անընդհատ համալիրը հանում է աճուրդի, սակայն ոչ մի գնորդ դեռ չի հայտնվել:
