Գորիսի ոստիկանությանը չի հաջողվում Սյունիքի մարզի ընդհանուր իրավասության դատարանի Գորիսի նստավայր բերման ենթարկել հունիսի 2-ին մարզպետ Սուրիկ Խաչատրյանի տան մոտ հնչած կրակոցների գործով վկա, Սուրիկ Խաչատրյանի որդուն՝ Տիգրան Խաչատրյանին, քանի որ վերջինս չի ցանկանում: NEWS.am-ի հետ զրույցում գործով մեղադրյալ Արտակ Բուդաղյանը փաստաբանը կարծիք հայտնեց, որ Տիգրան Խաչատրյանը վախենում է, որ դատարանում կասի մի բան, որն իրեն կվնասի:
«Տիգրան Խաչատրյանը չի ուզում գալ, իսկ եթե չի ուզում, ապա Գորիսի ոստիկանությունը չի էլ փորձի նրան բերման ենթարկել: Ոստիկանությունն ամեն անգամ երկտող կուղարկի, որ չի կարողանում հայտնաբերել: Տիգրան Խաչատրյանն էլ չի ուզում գալ, որովհետեւ վախենում է, որ հավանաբար ցուցմունք տալուց ինչ-որ նոր հանգամանքներ կբացահայտվեն: Մի բան հստակ է, որ ոստիկանությունն առաջնորդվելու է մարզպետի ցանկություններով եւ քմահաճույքներով»,- ասաց փաստաբանը:
Հայկ Ալումյանը նորից պնդեց, որ սխալ է Սյունիքում դատավարությունը շարունակել, քանի որ Սյունիքում ապրող դատավոր Նապոլեոն Օհանյանը չի կարող հավասար պայմաններում քննել գործը: Նշենք, որ հոկտեմբերի 2-ին կայացած նիստի ժամանակ փաստաբանը միջնորդություն ներկայացրեց դատավոր Նապոլեոն Օհանյանին ինքնաբացարկ հայտնելու մասին, որը սակայն, դատավորը մերժեց:
«Կարող ենք ասել, որ կարող ենք ասել, որ շատ ավելի դժվարացավ եւ ավելի բարդացավ այս գործով արդարադատությանը հասնելու ճանապարհը»,- ավելացրեց Հայկ Ալումյանը:
Հիշեցնենք, որ Արտակ Բուդաղյանին մեղադրանք է առաջադրվել այն բանի համար, որ նա, նախորդ տարվա հունիսի 1-ին տեղեկանալով, որ իր եղբայրը՝ Գորիսի քաղաքապետի նախկին թեկնածու Ավետիք Բուդաղյանը, Սյունիքի նախկին մարզպետ Սուրիկ Խաչատրյանի ավտոմեքենայում ծեծի է ենթարկվել, Սուրիկ Խաչատրյանին և նրա ընտանիքի անդամներին վախեցնելու նպատակով գնացել է Սուրիկ Խաչատրյանին պատկանող առանձնատան մոտ, իր անվամբ գրանցված որսորդական հրացանը ձեռքին իջնելով ավտոմեքենայից՝ սպանության սպառնալիքներ է տվել Սուրեն Խաչատրյանի ընտանիքի անդամներին: Ավետիք Բուդաղյանը սպանվել է, իսկ Արտակ Բուդաղյանը՝ հրազենային վնասվածքներով տեղափոխվել հիվանդանոց:
Արտակ Բուդաղյանին մեղադրանք է առաջադրվել Քրեական օրենսգրքի 137-րդ հոդվածի 1-ին մասով, որը նախատեսում է տուգանք՝ նվազագույն աշխատավարձի հիսնապատիկից հարյուրհիսնապատիկի չափով, կամ կալանք՝ առավելագույնը երկու ամիս ժամկետով, կամ ազատազրկում՝ առավելագույնը երկու տարի ժամկետով: Խափանման միջոց է ընտրվել ստորագրություն չհեռանալու մասին: