Չի կարելի բացառել Նախիջեւանում թուրքական ռազմակայանի տեղակայման հնարավորությունը, հատկապես այն թափանցիկ ակնարկների ֆոնին, որ արվել են Թուրքիայի նախագահ Աբդուլլահ Գյուլի կողմից` Ադրբեջան կատարած այցի ընթացքում: Այդ մասին NEWS.am-ի թղթակցի հետ զրույցում հայտնել է Ռազմական կանխատեսման ռուսաստանյան կենտրոնի ղեկավար Անատոլի Ցիգանոկը՝ մեկնաբանելով ադրբեջանական լրատվամիջոցների տեղեկությունները Նախիջեւանում թուրքական ստորաբաժանումների հնարավոր տեղակայման մասին:
Ցիգանոկն ընդգծել է, թե Ադրբեջանում ռազմակայան հիմնելուն Թուրքիային կարող է մղել Մոսկվայի եւ Երեւանի միջեւ կնքված պայմանագիրը` Հայաստանում ռուսական ռազմակայանի գործողության ժամկետը երկարաձգելու մասին: «Այդ հարցը պետք է դիտարկել ոչ այնքան եւ ոչ միայն թուրք-ադրբեջանական, որքան թուրք-ռուսական հարաբերությունների համատեքստում» - նշել է փորձագետը՝ նկատի ունենալով Մոսկվայի եւ Անկարայի ակտիվացած բազմաշերտ համագործակցությունը: Նրա խոսքով, Անկարան որեւէ քայլ չի ձեռնարկի, որոնք կարող են կասկածի տակ դնել համագործակցությունը: «Անկարան «կիպ» նստել է ռուսական ասեղի վրա: Նախ առեւտրական, ապա էներգետիկ, այժմ էլ ռազմական տեխնիկական ասեղի վրա: Եւ դժվար թե կարողանա քայլեր ձեռնարկել առանց Ռուսաստանի շահերը հաշվի առնելու»,- ասել է փորձագետը:
Նշենք, որ Թուրքիայի նախագահն Ադրբեջան կատարած այցի ընթացքում խոսել է Ռազմավարական գործընկերության պայմանագիր կնքելու մասին, որն, ըստ էության, նշանակում է նոր ռազմա-քաղաքական դաշինքի ստեղծում, որի շրջանակներում Ադրբեջանում կարող է հայտնվել Թուրքիայի ռազմաբազան: