Սերժ Սարգսյանն այսօր ժամանել է Վիեննա, որտեղ հանդիպումներ են նախատեսված Եվրամիության արտաքին քաղաքականության և անվտանգության հարցերով բարձր ներկայացուցիչ Ֆեդերիկա Մոգերինիի, ապա Միացյալ Նահանգների պետքարտուղար Ջոն Քերրիի հետ: Ավելի ուշ, նախագահը կմասնակցի ընդլայնված կազմով հանդիպմանը՝ ԵԱՀԿ-ի Մինսկի խմբի համանախագահների հետ: Վիեննայում է նաեւ Իլհամ Ալիեւը: Հայկական կողմը առայժմ չի հաստատում՝ կլինի Սարգսյան-Ալիեւ հանդիպում, թե ոչ, որի մասին միջազգային աղբյուրները խոսում էին դեռ մի քանի օր առաջ: Ենթադրվում է, որ առանձին հանդիպումների արդյունքով է պայմանավորված երկու նախագահների հանդիպման հնարավորությունը:
Ազգային ժողովն այսօր մերժել է նստաշրջանի օրակարգ ընդունել «Արցախի Հանրապետությունը ճանաչելու մասին» Զարուհի Փոստանջյանի եւ Հրանտ Բագրատյանի հեղինակած օրենքի նախագիծը Կողմ է քվեարկել ընդամենը 12 պատգամավոր՝ ՀՅԴ-ից եւ Ժառանգությունից: Մյուս պատգամավորները պարզապես չեն մասնակցել քվեարկությանը՝ պատճառաբանել են՝ Արցախի ճանաչումը այս փուլում կարող է վնասել գործընթացին:
Գործընկերների պատճառաբանությունները նախագծի հեղինակներին չի համոզել: Բագրատյանը կարծում է՝ քննարկելը հաստատ վնաս չէր տա: Փոստանջյանն էլ կարծում է՝ նույնիսկ ճանաչման դեպքում Արցախն ավելի վտանգված չէր լինի, քան հիմա է:
Գեներալ Մանվել Գրիգորյանին հարկավոր է հետ կանչել Արցախից: Սերժ Սարգսյանին նման կոչ է արել Արցախի խորհրդարանի պատգամավոր, արցախյան պատերազմի ժամանակ դաշտային հրամանատար, մարտական խաչի ասպետ Վահան Բադասյանը: Նրա խոսքով՝ օրեր առաջ Մանվել Գրիգորյանը Հադրութով անցնելիս կանգնել եւ հայհոյել է դիրքեր մեկնող զինծառայողներին, որոնք կանգնեցրել էին մեքենան ճանապարհին եւ իրենց իրերն էին դասավորում դիրքեր մեկնելուց առաջ: Գեներալին բարկացրել է այն, որ տղաների մեքենայի պատճառով իրենց մեքենայի անցնելու տեղը նեղացել է: Պաշտպանության նախարարի մամուլի խոսնակ Արծրուն Հովհաննիսյանը ահրաժարվել է մեկնաբանել կատարվածը: ՀՀԿ խմբակցության ղեկավար Վահրամ բաղդասարյանն էլ պաշտպանել է Մանվել Գրիգորյանին, իսկ Վահան Բադասյանին խորհուրդ է տվել զգույշ արտահայտվել Արցախի հերոսի վերաբերյալ հայտարարություններ անելիս:
Բանակի հետ կապված մեկ այլ աղմկահարույց պատմությունը վաստակավոր արտիստ Արմենչիկի օգնություն բաժանելն էր: Երգիչը տոպրակներով օգնություն էր բաժանել շարքով իրեն մոտեցող զինծառայողներին ու հրապարակել տեսանյութը, ինչը հասարակությունը գնահատել էր ստորացուցիչ պահվածք զինվորների նկատմամբ: Այս հարցին նախարարությունը ընթացք է տվել:
Մայիսի 14-ին Վայոց ձորի մարզում՝ հայ-ադրբեջանական սահմանին հակառակորդի դիպուկահար կրակոցից զոհվել է պայմանագրային զինծառայող Արամ Օհանյանը: 25-ամյա զինծառայողը վիրավորվել էր որովայնի շրջանում ու մեկ ժամ անց մահացել հիվանդանոցում: Արամը Աղավնաձորից էր, ամուսնացած էր, ուներ փոքրիկ երեխա:
Մայիսի 13-ին Արցախում հրազենային վիրավորում ստացած 21-ամյա Հովհաննես Պողոսյանին Մարտակերտում վիրահատելու հետո տեղափոխել են Ստեփանակերտ, ապա Երեւան՝ Կենտրոնական զինվորական հոսպիտալ: Նրա վիճակը գնահատվում է ծայրահեղ ծանր: Հովհաննեսը ստացել է գանգուղեղային ծանր վիավորում, կոմայի մեջ է, միացված է արհեստական շնչառության սարքի։
Ապրիլյան քառօրյա պատերազմում ողնուղեղի ծանր վիրավորում ստացած՝ ժամկետային զինծառայող Արման Լազգիյանի արտասահմանում բուժվելու հարցը վերջապես լուծվել է: Մինչեւ շաբաթվա վերջ նա կմեկնի Համբուրգ: Իսկ ողնաշարային հատվածում ծանր վիրավորում ստացած մյուս զինծառայողին՝ Ռուբեն Առաքելյանին արտասահման տեղափոխելը հնարավոր կլինի 2-3 շաբաթ անց, երբ նրա վիճակը մի փոքր կբարելավվի:
Ապրիլի վերջինին Իջեւանի զորամասերից մեկում մահացած հայտնաբերված 18-ամյա Հովհաննես Պետրոսյանի հայրը բացառում է, որ որդին կարող էր ինքնասպան լինել: Նախ նա չէր կարող երկու անգամ ինքն իր գլխին կրակել: Բացի դրանից՝ մի քանի օր առաջ Հովհաննեսը հորը հեռախոսով պատմել էր, որ սպաներն ուզում են բենզին գողանալ, իսկ ինքը թույլ չի տալիս, ինչի պատճառով էլ նրանց միջև կոնֆլիկտ է ստեղծվել:
Սինքրոն - 24-ամյա Արսեն Մարգարյանը պատմում է՝ ինչ է տեղի ունեցել մայիսի 10-ին Լոռու մարզի Շնող գյուղում: Պարզվում է՝ նա 56-ամյա Սուսաննա Գալինյանին բռնաբարել է սպանելուց հետո: Սուսաննան նրա ազգականուհին էր, հոգեկան շեղումներ ուներ, ապրում էր միայնակ: Կինը մերժել է սեռական հարաբերության առաջարկը, Արսենը խեղդամահ է արել նրան, ապա բռնաբարել եւ այրել անկողինը, սակայն հետքերը թաքցնել չի հաջողվել:
Հանգստյան օրերին երկու սպանություն է տեղի ունեցել Շիրակի եւ Վայոց Ձորի մարզերում: Գյումրիում հրազենից սպանվել է «Դղյակ» սուպերմարկետի սեփականատեր Գուրգեն Ավետիսյանը: Սպանությունը կատարելու կասկածանքով ձերբակալվել է նրա մանկության ընկերը՝ նախկին հարկային տեսուչ Արմեն Փափազյանը, որը խոստովանական ցուցմունք է տվել:
Եվս մեկ սպանություն, այս անգամ՝ Եղեգնաձոր քաղաքում: Ուշ երեկոյան վիճաբանությունը վերածվել է ծեծկռտուքի ու դանակահարության: 25-ամյա Սամվել Հովակիմյանը, որը պայմանագրային զինծառայող էր, մահացել է, եւս 4 երիտասարդ վնասվածքներով հիվանդանոց են տեղափոխվել: Տուժածներից մեկի վիճակը ծանր է:
Երկու շաբաթվա որոնումներից հետո 56-ամյա Գառնիկ Պետրոսյանի դին գտել են Վրաստանի տարածքում՝ Քուռ գետի վտակներից մեկում: Լոռու մարզի Շնող գյուղի բնակիչը անհետացել էր մոր ինքնահողից հետո: Գյուղացիները տեսել էին, որ նա ալկոհոլի ազդեցության տակ գնում է Դեբետ գետի ուղղությամբ: Ասել էր, որ գնում է նետվի գետը:
«Եվրատեսիլ 2016»-ին Հայաստանը ներկայացնող Իվետա Մուկուչյանը վերադարձել է Հայաստան: Վաղ առավոտյան օդանավակայանում նրան դիմավորել են բազմաթիվ երկրպագուներ: Չնայած մրցույթում մեր պատվիրակը 7-րդ տեղն էր զբաղեցրել, նա վստահեցրել է, որ շատ ջերմ ընդունելության է արժանցել Շվեդիայում:
Երեւանում մայիսի 17-ին սպասվում է կարճատեւ անձրեւ եւ ամպրոպ: Առաջիկա գիշերը մայրաքաղաքում կդիտվի մինչև 17, իսկ վաղը ցերեկը՝ մինչև 28 աստիճան տաքություն։
Այսօր աննշան արժևորվել է միայն ռուբլին, մյուս երեք արտարժույթների փոխարժեքները նվազել են: Այսպիսով, դոլարի փոխարժեքը կազմել է 478, եվրոյինը՝ 541, ֆունտինը՝ կազմել է 686, իսկ ռուբլունը 7.36 դրամ: