«Էրեբունի» բժշկական կենտրոնում հոկտեմբերի 1-ին մահացած 20-ամյա Զարուհի Պետրոսյանի մահվան փաստի առթիվ հարուցվել է քրեական գործ: Այս մասին NEWS.am-ին հայտնեցին ոստիկանության լրատվական ծառայությունից, հավելելով, որ Զարուհի Պետրոսյանին մահվան է հասցրել ամուսինը՝ Յանիս Սարկիսովը` դաժանաբար ծեծելով կնոջը: Յանիս Սարկիսովն այժմ ձերբակալված է: Ոստիկանությունից հայտնեցին նաեւ, որ նախաքննությունն ավարտվել է, դեպքը բացահայտվել է եւ այդ մասին համապատասխան տեղեկատվությունը մոտ մեկ ժամից կտեղադրվի ոստիկանության կայքում:
Հիշեցնենք, որ սեպտեմբերի 30-ին, ժամը 20.00-ին, հիվանդանոցից ոստիկանության Մասիսի բաժնում հաղորդում է ստացվել, որ «գանգուղեղի հեմատոմա, աջ ձեռքի 2-րդ մատի միջին ֆալանգի փակ կոտրվածք` առանց տեղաշարժի, եւ մարմնի տարբեր շրջանների արյունազեղումներ» ախտորոշմամբ իրենց մոտ է ընդունվել 20-ամյա Զարուհի Պետրոսյանը: Նույն օրը, Զարուհի Պետրոսյանը տեղափոխվել էր «Էրեբունի» բժշկական կենտրոն, որտեղ հոկտեմբերի 1-ին, ժամը 3-ին մահացել էր: Ըստ Հայաստանի ոստիկանության՝ 20-ամյա աղջիկը հիվանդանոցում հայտնել է, որ գլխապտույտի հետեւանքով վայր է ընկել, մինչդեռ, ինչպես NEWS.am-ին հայտնել էին Պետրոսյանի հարազատները, նրան օրեր շարունակ դաժան ծեծի էին ենթարկել ամուսինն ու սկեսուրը: