Նախօրեից սոցիալական ցանցերում բուռն քննարկվում էր նորությունը, որ 2015 թվականին Հայաստանից Ադրբեջան է արտահանվել «9306» կոդով ապրանք: Սա բազմաթիվ հարցեր էր առաջացրել, քանի որ այս կոդը վերաբերում է ռազմամթերքին: Ինչ ռազմամթերք է Հայաստանից արտահանվել Ադրբեջան եւ ինչ նպատակով: Ի վերջո, Պետական եկամուտների կոմիտեն պարզաբանեց. խոսքը 400 փամփուշտի մասին է, որը Հայաստանի հրաձգության ֆեդերացիան ուղարկել է Ադրբեջան այնտեղ կայացած Եվրոպայի խաղերին Հայաստանի հավաքականի մասնակցության համար:
Բուռն բանավեճից հետո Հարկային օրենսգրքի նախագիծն այսօր Ազգային ժողովում ընդունվել է առաջին ընթերցմամբ:Կողմ է քվեարկել միայն Հանրապետական խմբակցությունը: Նույնիսկ ՀՀԿ-ի կոալիցիոն գործընկեր «Դաշնակցությունը» կողմ չի քվեարկել նոր օրենսգրքին: Ընդդիմադիրները պահանջում էին հետ կանչել նախագիծն ու քննարկել վիճահարույց դրույթները: Հարկային օրենսգիրքը նախատեսում է պարզեցնել բիզնեսի ստուգումները, ինչպես նաև թեթևակի փոխել առանձին հարկատեսակների դրույքներն ու հարկման բազան, եկամտահարկը նվազեցնել ցածր աշխատավարձերի, և բարձրացնել 204 հազարից դրամից բարձր աշխատավարձերի համար: Նախատեսվում է բարձրացնել ծխախոտի եւ օղու ակցիզը, սակայն ձեռք չտալ գինուն ու կոնյակին: Սրանից բացի, Հայաստանում առաջին անգամ կհարկվեն ֆիզիկական անձանց շահաբաժինները:
Հունիսի 15-ին վերսկսվել են Ընտրական օրենսգրքի շուրջ 4+4+4 ձեւաչափով քննարկումները, որոնց մասնակցում են իշխանության, ընդդիմության եւ քաղաքացիական հասարակության ներկայացուցիչները: Նշենք, որ այս ձեւաչափով քննարկումների առաջին փուլում հաջողություն չգրանցվեց. կողմերը համաձայնության չեկան, ընտրական օրենսգիրքն ընդունվեց առանց կոնսենսուսի: Սակայն կողմերը հնարավոր էին համարում այս ձեւաչափով քննարկումների վերսկսումը՝ պայմանով, որ ընդդիմության կոնկրետ պահանջների շուրջ համաձայնության դեպքում Ազգային ժողովի արտահերթ նիստ գւոմարվի եւ համապատասխան փոփոխություններ կատարվեն օրենսգրում: «Ժառանգությունը» քննարկումներին չի մասնակցում: ՀԱԿ-ը, ՕԵԿ-ը եւ ԲՀԿ-ն, ինչպես քաղաքացիական հասարակության ներկայացուցիչները հույս ունեն, որ այս անգամ համաձայնությունն իշխանության հետ հնարավոր է իրենց որոշ պահանջների, մասնավորապես քվեարկողներից 10 մատի մատնահետք վերցնելու առաջարկի շուրջ:
Սուրիկ Խաչատրյանի դեմ մահափորձի գործով որպես մեղադրյալ ներգրավված Արա Բուդաղյանի նկատմամբ քրեական հետապնդումը դադարեցնելուց եւ նրան ազատ արձակելուց հետո Բուդաղյանների ընտանիքը չի դադարելու պայքարել արդարության հաստատման համար: Ընտանիքի փաստաբան Հայկ Ալումյանը հայտարարել է, որ ամեն ինչ անելու են, որպեսզի բացահայտվի Ավետիք Բուդաղյանի սպանությունը: Նշենք, որ մինչեւ այսօր որեւէ մեկը պատասխան չի տվել այդ սպանության համար: Ավելին՝ Բուդաղյանները կասկածում են, թե դրանից մի քանի տարի անց Սուրիկ Խաչատրյանի դեմ մահափորձը բեմադրված չի եղել, ինչի արդյունքում Արա Բուդաղյանը անարդարացիորեն մեղադրվել եւ 11 ամիս պահվել անազատության մեջ:
Երեւանում այսօր երիտասարդ տղամարդ է ցանկացել ինքնասպան լինել: Եղվարդ քաղաքի 30-ամյա բնակիչը անցել է Հաղթանակի կամրջի արգելապատնեշը, կանգնել հակառակ կողմում ու ասել, որ ուզում է նետվել: Փրկարարներին հաջողվել է նրան համոզել չդիմել նման քայլի: Տղամարդը ոստիկաններին ասել է, որ անձնական խնդիրների պատճառով է նման քայլի դիմել:
Արտառոց դեպք է տեղի ունեցել Արմավիրում: 15-ամյա բնակիչը մեղադրվում է 5-ամյա եւ 9-ամյա երեխաների նկատմամբ սեռական բնույթի գործողություններ կատարելու մեջ։Նախաքննությունը ապացուցված է համարել, որ գործողությունները կատարվել են բռնի, օգտվելով տարիքով պայմանավորված անտեղյակությունից եւ դիմադրելու անկարողությունից: Քրեական գործը դատարանում է:
Երեւան-Բաթումի-Երեւան երթուղու «Արմենիա» գնացքը վերսկսել է աշխատանքը: Սեզոնի առաջին գնացքը մեկնել է հունիսի 15-ին ժամը 15:30-ին: Այդ ժամին է այսուհետեւ ամեն օր գնացքը դուրս գալու Երեւանի կայարանից եւ Բաթում է հասնելու 15 ժամ 40 րոպեում: Տոմսերն անցած տարվա համեմատ էժանացել են մոտ 20%-ով:
Երեւանի Սուրբ Հովհաննես եկեղեցում տեղի է ունեցել ժողովրդական արտիստ Օֆելյա Համբարձումյանի հոգեհանգիստը: Ներկա են նրա ընտանիքի անդամները, հարազատները, մշակութային, քաղաքական, հասարակական գործիչներ, երկրպագուներ: 91 տարեկանում վախճանված արտիստին կհուղարկավորեն վաղը Կոմիտասի անվան պանթեոնում:
Հուլիսի 10-ից Հայաստանում կինոյի մեկ շաբաթյա տոն է: Մեկնարկելու է «Ոսկե ծիրան» միջազգային 13-րդ փառատոնը: Կազմակերպիչները առայժմ չեն բացահայտում գլխավոր ինտրիգները՝ ինչ միջազգային ֆիլմեր են ցուցադրվելու եւ արդյոք ավանդույթի համաձայն պետք է սպասել համաշխարհային կինոստղերի այցելություններին: Այս հարցերի պատասխանները խոստանում են տալ փառատոնից մեկ շաբաթ առաջ, միայն հայտնում են, որ այս տարվա փառատոնը նվիրված է լինելու Հայաստանի անկախության 25-ամյակին: Մրցութային եւ արտամրցութային տարբեր ծրագրերում ընդգրկվել է շուրջ 135 ֆիլմ:
Եվրո 2016-ին Ռուսաստանի հավաքականի հետագա մասնակցությանը սպառնացող վտանգն անգամ չի կարողանում զսպել ռուս երկրպագուներին: Չնայած բացման օրը Մարսելում սարքած ծեծկռտուքից հետո ՈւԵՖԱ-ն 150 հազար եվրոյով տուգանել էր Ռուսաստանի ֆուտբոլային միությանը եւ նախազգուշացրել, որ ստադիոնում ռուսաստանցի ֆանատների կողմից որեւէ խախտման դեպքում, թիմը կորակազրկվի եւ կհեռացվի մրցաշարից, նախօրեին Լիլ քաղաքում ֆրանսիական ոստիկանությունը ստիպված է եղել ռուս ֆանատներին ցրել արցունքաբեր գազով: Նրանք դարձյալ բախվել էին անգլիացի երկրպագուների հետ:
Եվրոն ու դոլարը մի քիչ էժանացել են, իսկ ռուբլին ու ֆունտը՝ թանկացել:Դոլարի փոխարժեքը կազմել է 478, ռուբլունը՝ 7.27, եվրոյինը՝536, իսկ ֆունտինը՝ 679 դրամ:
Հունիսի 16-18-ը օդի ջերմաստիճանը 4-5 աստիճանով կնվազի: Երևանում հունիսի 16-ին տեղումներ չեն լինի: Գիշերը սպասվում է 18-20 , իսկ ցերեկը՝ 30-32 աստիճան տաքություն:
