Վարչապետ Հովիկ Աբրահամյանի հրաժարականն ունի երկու պատճառ՝ «Սասնա ծռեր» եւ տնտեսական խնդիրներ: NEWS.am-ի թղթակցի հետ զրույցում նման կարծիք հայտնեց քաղտեխնոլոգ Կարեն Քոչարյանը՝ պատասխանելով հարցին, թե ինչու հենց այս փուլում հրաժարական տվեց Աբրահամյանը եւ արդյոք դա կապ ուներ «Սասնա ծռերի» հետ:
«Վարչապետն էլ է իր խոսքում այդ մասին ակնարկել: Երկու խնդիր կա. տնտեսական, որն արձանագրեց Վիճակագրական ծառայությունը, այն է՝ տնտեսական անկում է եղել, սրան հետեւում է սոցիալական դժգոհությունը: Երկրորդ, այդ դժգոհությունը քաղաքական արտահայտություն է ստանում «Սասնա ծռերի» տեսքով»,- ասաց Կարեն Քոչարյանը:
Դիտարկմանը, թե «Սասնա ծռեր» խումբը նախագահի հրաժարական էր պահանջում, քաղտեխնոլոգը նշեց, որ իշխող «Հանրապետական» կուսակցությունն է որոշում Կառավարության ղեկավարին եւ անդամներին, իսկ վարչապետը բոլոր ժամանակներում էլ ամենախոշոր քավության նոխազն է:
«Առաջին հերթին իշխանությունների շահերից է բխում քաղաքական կամքը, հակառակ պարագայում «Սասնա ծռերն» այս կամ այն կերպ կարող են կրկնվել ոչ ՊՊԾ-ում, այլեւ ԿԿԾ-ում կամ ինչ որ Ծ-ում: Այս փուլում հենց իշխանությունների շահերից է բխում սոցիալապես անպաշտպան խավին ինչ-որ առումով շահել, փափկացնել վիճակը»:
Նշենք, որ վարչապետ Հովիկ Աբրահամյանը սեպտեմբերի 8-ին հրաժարական է ներկայացրել: Նա պաշտոնավարում էր 2014թ. գարնանից: