Ցանկացած կուսակցության համար պատվաբեր կլինի, որպեսզի Սեյրան Օհանյանի նման պետական, ռազմական գործիչը համագործակցեր իրենց հետ: Այս մասին այսօր՝ հոկտեմբերի 11-ին, լրագրողների հետ հանդիպման ժամանակ նշել է Վիկտոր Դալլաքյանը, ով հայտարարել է իր հրաժարականի եւ ակտիվ քաղաքական պայքարի մեջ մտնելու մասին:
«Այն ձեւաչափը, որով ես կմասնակցեմ 2017-ի խորհրդարանական ընտրություններին, համապատասխան կուսակցական ցուցակը կլինի, թույլ տվեք փակագծերը չբացել, բայց այս ամսվա ընթացքում մանրամասներ կհաղորդեմ»,-ասաց նա՝ հավելելով. «Միայն մի բան կարող եմ ասել՝ այդ կուսակցության անունը շրջադարձ չէ»:
Ինչ վերաբերում է մամուլում շրջանառվող տեղեկություններին, թե իր նոր ստեղծելիք կուսակցության անդամ է լինելու նաեւ Պաշտպանության նախկին նախարար Սեյրան Օհանյանը, Վիկտոր Դալլաքյանն արձագանքեց. «Սեյրան Օհանյանն իր գործունեության եւ ծրագրերի մասին որեւէ հրապարակային հայտարարություն չի կատարել, ուստի ես ձեռնպահ կմնամ որեւէ գնահատական տալ, երկրորդ՝ ես բարձր եմ գնահատում Սեյրան Օհանյանի գործունեությունը, եւ կարծում եմ, որ ցանկացած կուսակցության համար պատվաբեր կլինի, որպեսզի նման պետական, ռազմական պետական գործիչը համագործակցեր իրենց կուսակցության հետ»: