Հյուսիսային Օսիայում վթարի է ենթարկված փոխադրամիջոցն առանց Ռուսաստանի տրանսպորտի նախարարության թույլտվության է աշխատել: Այս մասին ՏԱՍՍ-ին հայտնել են «Ուղեւորափոխադրումների կազմակերպիչ» Պետական հսկողության վարչության մամուլի ծառայությունից:
«Նախօրեին Բեսլանի մոտ վթարված փոխադրամիջոցի մասին տեղեկություններ չկան Ռուսաստանի տրանսպորտի նախարարության ավտոբուսների միջազգային պարբերական երթուղիների ռեեստրում: Ավտոբուսը Մոսկվայից դուրս է եկել հոկտեմբերի 13-ին: Քաղաքային ավտոկայաններում այդ երթուղու մասին տվյալներ չկան, ասել են մամուլի ծառայությունից:
«Հոկտեմբերի 14-ի առավոտյան Հյուսիսային Օսիայում մայրուղու վրա ավտոբուսը մխրճվել է Scania բեռնատարի մեջ: Ավտոբուսի սրահում 52 ուղեւոր է եղել, տվյալ պահին տեղեկություններ կան 5 զոհի եւ 27 տուժողների մասին»,- նշել են մամուլի ծառայությունում՝ պարզաբանելով, որ միջազգային երթուղում պաշտոնապես աշխատելու համար ուղեւորափոխադրողը պետք է ավտոկայանի հետ պայմանագիր կնքի եւ ստանա Ռուսաստանի տրանսպորտի նախարարության թույլտվությունը: Ուղեւորների հարմարավետության համար կազմակերպվում են Մոսկվա-Երեւան-Մոսկվա երթուղով պաշտոնական չվերթներ, երթուղում աշխատելու են «Գոլդեն տրանս-տուր» եւ «Եվրասիա» ընկերությունները: Ավտոբուսները Երեւան են ուղեւորվելու «Հարավային դարպասներ» ավտոկայանից:
Ավելի վաղ NEWS.am-ը հաղորդել էր, որ հոկտեմբերի 14-ին, ժամը 04:30-ին Վլադիկավկազի շրջանում իրար են բախվել Մոսկվա-Երեւան երթուղու ավտոբուսն ու «Սկանիա» բեռնատարը: Վթարի հետեւանքով 5 մարդ է զոհվել, այդ թվում՝ ավտոբուսի վարորդը: Ավտոբուսում 52 ուղեւոր է եղել: Վերջին տվյալներով՝ հիվանդանոցներ են տեղափոխվել 27 մարդիկ: Այս պահին ներկայացված ցուցակի համաձայն՝ Վլադիկավկազի 3 հիվանդանոցներում են մնացել 10 տուժած քաղաքացիներ: Տուժողների թվում 4 երեխա կա: