Գյումրիում այսօր՝ հոկտեմբերի 14-ին, տեղի ունեցած վիճաբանության մասնակիցների մասը բերման է ենթարկվել: Այս մասին այսօր լրագրողների հետ զրույցում ասել է Շիրակի մարզային քննչական վարչության պետի պաշտոնակատար Սահակ Մկրտչյանը, սակայն, չի մանրմասնել, թե ովքեր են բերման ենթարկվածները՝ նշելով, որ տվյալները ճշտվում են: Նա նշել է, որ դեռ պարզ չէ՝ կրակոցներ հնչել են, թե ոչ. դեպքի վայրում կրակված փամփուշտներ չեն հայտնաբերվել, սակայն, հայտնաբերվել են արյան հետքեր:
«Դեպքի վայրում հայտնաբերվել է գազային ատրճանակի 4 չկրակված փամփուշտ, վթարված մեքենաներ: Ըստ նախնական տեղեկությունների՝ տեղի է ունեցել ավտովթար, որի հետեւանքով էլ վիճաբանություն է առաջացել: Մասնակիցների մի մասը բերման են ենթարկվել, տվյալները ճշտվում են: Կրակոցների վերաբերյալ ընդհանրապես տեղեկություն չկա, դեպքի վայրում հայտնաբերված առարկաները չեն խոսում կրակոցների մասին: Ընդհանրապես կրակված փամուշտներ չկան, միայն մեքենաներն են վնասված: Արյան հետքեր հայտնաբերվել են դեպքի վայրում, սակայն, հիվանդանոց դիմողներ չեն եղել»,-ասել է նա:
Նշենք, որ մեքենաները տեղափոխվել են քննչական վարչության հատուկ պահպանվող տարածք, Գյումրիի Ալեք Մանուկյան փողոցն արդեն բացվել է:
Հարուցվել է քրեական գործ՝ՀՀ ՔՕ 258 հոդվածով՝ Խուլիգանություն:
Ավելի վաղ NEWS.am-ի թղթակցին Գյումրիի բնակիչներն հայտնել էին, որ Ալեք Մանուկյանի փողոցում կրակոցներ են հնչել:
Ժամը 14.50-ի սահմաններում Ալեք Մանուկյան փողոցում իրար են բախվել երկու մեքենաներ, որին հետեւել է փոխհրաձգությունը: Փողոցը երկու կողմից փակ է: