NEWS.am-ին նոր մանրամասներ են հայտնի դարձել նոյեմբերի 24-ի գիշերը Մոսկվայում գնդակահարված հայի մասին:
Ռուսաստանում ՀՀ դեսպանատնից հայտնում են, որ մայրաքաղաքի Յասնեւո շրջանում գնդակահարված Գեւորգ Գեւորգյանը Մոսկվայում նախկինում դատապարտված է եղել:
Ըստ տեղեկատվության` Գեւորգյանը վերջին անգամ Ռուսաստան մուտք էր գործել մեկ ամիս առաջ: Նշենք, որ ռուսական լրատվամիջոցների հաղորդմամբ` սպանվածը Մոսկվայում շինարարական բիզնեսով էր զբաղվում:
Ավելի վաղ հայտնի է դարձել, որ Մոսկվայի հարավ-արեւմուտքում իրականացված տղամարդու սպանությունը նման է պատվերով սպանության: Ինչպես տեղեկացրել ենք, սպանվածի հրազենային վիրավորումով դիակը հայտնաբերվել է Լիտովսկի պուրակի մոտ:
Իրավապահ մարմիններից հայտնել են, որ անհայտ անձը Կալաշնիկովի կարճափող ինքնաձիգով գնդակահարել է տղամարդուն, որից հետո փախուստի է դիմել՝ զենքը թողնելով սպանության վայրում:
Քննչական կոմիտեից այս տեղեկությունը հաստատել են՝ հստակեցնելով, որ ինքնաձիգը գտել են դիակից 300 մետր հեռավորությամբ:
Սպանվածի կողքին կանգնած է եղել մեքենա, որի մեջ, նախնական տեղեկություններով, գնդակի երեք հետք է հայտնաբերվել:
