Սարսափելի դեպք Լոռու մարզում: Սպիտակ քաղաքում շենքերից մեկի շքամուտքում հայտնաբերել են 45-ամյա Մարինե Հովհաննիսյանի դին՝ կախված վիճակում, իսկ բնակարանի ննջասենյակում գտել են նրա 7 եւ 8 տարեկան դուստրերի մարմինները: Նախնական վարկածով՝ կինը խեղդամահ է արել երեխաներին, ապա ինքնասպան եղել: 45-ամյա կինը Սարալանջ գյուղի դպրոցում քիմիայի ուսուցչուհի է աշխատել: Նա մեկ տարի առաջ է Հարթագյուղ գյուղից Սպիտակ տեղափոխվել, որտեղ ապրել է վարձակալած բնակարանում:
Բացվել է Երեւանի կենտրոնը բեռնաթափող եւ Նորագավիթը շրջանցող ճանապարհը: Արշակունյաց պողոտա-Շիրակի փողոց-Արտաշատի խճուղի ճանապարհի շինաշխատանքների պայմանագրային արժեքը շուրջ 11 մլրդ դրամ է: Նորակառույց ճանապարհի երկարությունը 5 կմ է, միջին լայնությունը՝ 24-28 մետր: Շահագործման հանձնված ճանապարհը Երեւանի շրջանցիկ ճանապարհի մի հատվածն է, հաջորդ փուլով իրար կկապվեն մայրաքաղաքի հյուսիսային եւ հարավային մուտքերը:
Սեյրան Օհանյանը քաղաքականություն է մտնելու: Պաշտպանության նախկին նախարարն այդ մասին կհայտարարի առաջիկայում: Վիկտոր Դալլաքյանն այսօր լրագրողների հետ հանդիպմանը հայտարարել է Օհանյանի հետ համագործակցելու մասին: Նա եւս մեկ անգամ հայտարարել է, որ բարձր է գնահատում Սեյրան Օհանյանի գործունեությունը եւ վստահեցրել. ցանկացած կուսակցության պատիվ կբերեր նրա հետ համագործակցությունը:
Լիբանանի նոր կառավարության կազմում երկու հայ նախարար կա. Ավետիս Կիտանյանը ղեկավարելու է զբոսաշրջության, Ժան Օղասափյանը՝ կանանց հարցերի նախարարությունը: Երկրի վարչապետ է դարձել Սաադ Հարիրի: Կիտանյանը դաշնակցական է, իսկ Ժան Օղասաբյանը համարվում է վարչապետ Հարիրիի մտերիմներից: Հիշեցնենք, որ շուրջ 2.5 տարի տեւած քաղաքական ճգնաժամից հետո Լիբանանի խորհրդարանը նախագահ ընտրեց գեներալ Միշել Աունին:
Սիրիահայն ինքնասպանություն է գործել Երեւանում: Մայրաքաղաքի կենտրոնում բնակելի շենքերից մեկի ութերորդ հարկից ցած է նետվել Սիրիայի 40-ամյա քաղաքացի Գաբրիել Ժան Բաշարյանը: Ինքնասպանությանն ականատես է եղել նրա եղբայրը: Դեպքի այլ մանրամասներ առայժմ հայտնի չեն:
Երեւանի Ծիծեռնակաբերդի անտառում դեկտեմբերի 18-ին տղամարդու դի է հայտնաբերվել: Նա թոշակառու էր, 85 տարեկան, ոստիկանության կողմից որոնվում էր որպես անհետ կորած։ Ոստիկանության լրատվական ծառայությունից հաստատել են տեղեկությունը:
Երեւանի բյուջեից 20 մլն դրամ խնայեցինք. Հանրապետության հրապարակում առանց հանդիսության վառել են գլխավոր տոնածառի լույսերը: Քաղաքապետ Տարոն Մարգարյանը, որն ամեն տարի պաշտոնական արարողության ժամանակ սեղմում էր գլխավոր տոնածառի լույսերը միացնող խորհրդանշական կոճակը, այս տարի Հանրապետության հրապարակ չէր գնացել: Ամեն դեպքում՝ հրապարակում տոնական տրամադրություն էր. տոնածառի լուսավորումն ուղեկցվել է հավաքվածների ծափերով: Այսօր մեկնարկել է նաեւ «Սառցե քաղաքը» ամանորյա հեքիաթային ծրագիրը. «Սառցե քաղաքը» կառուցվել է Ազատության հրապարակում:
Դոլարն ու եվրոն շարունակում են արժեզրկվել: Դեկտեմբերի 19-ին դոլարի փոխարժեքը կազմել է 482 դրամ, եվրոյինը՝ 504, ռուբլունը՝ 7 դրամ 82 լումա, ֆունտինը՝ 601 դրամ։
Սառնամանիքը ոչ մի կերպ չի ուզում նահանջել: Դեկտեմբերի 20-ին առանց տեղումների եղանակ կլինի, բայց օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: Գիշերը մայրաքաղաքի բարձրադիր գոտիներում կդիտվի -16-18, վաղը ցերեկը՝ -5-7 աստիճան, իսկ ցածրադիր գոտիներում՝ գիշերը -19-21, ցերեկը՝ -5-7 աստիճան:
