Հայ-ադրբեջանական սահմանին հակառակորդի դիվերսիայի հետեւանքով զոհված Էդգար Նարայանը 20 տարեկան էր, ընտանիքի միակ որդին։ Այս մասին NEWS.am-ի թղթակցի հետ զրույցում այսօր՝ դեկտեմբերի 29-ին, հայտնել են Էդգարի ընկերները։ 20-ամյա զինվորը Երեւանից էր, պետք է զորացրվեր հինգ ամիս հետո։ Նա ընկերների հետ զրուցել է օրեր առաջ, երբ պետք է բարձրանար դիրքեր։
Հարազատներն ու ընկերները վերջին անգամ Էդգարին տեսել են երեք ամիս առաջ։ Նա արձակուրդ էր եկել քրոջ հարսանիքին մասնակցելու նպատակով։ Էդգարը ունի երկու քույր։ Մինչ բանակ զորակոչվելը, սովորել է Ֆրանսիական համալսարանում, ծրագրավորող էր։
Պաշտպանության նախարարության մամուլի ծառայությունից հայտնել էին, որ Հայաստանի Հանրապետության պետական սահմանի պաշտպանության համար մղված մարտերի ընթացքում զոհվել են ավագ լեյտենանտ Շավարշ Մելիքսեթի Մելիքյանը, շարքայիններ Էդգար Գրիգորի Նարայանը եւ Էրիկ Գարիկի Աբովյանը:
Ավելի վաղ ՀՀ պաշտպանության նախարարի մամուլի քարտուղար Արծրուն Հովհաննիսյանը հայտնել էր, որ Այսօր՝ դեկտեմբերի 29 ին վաղ առավոտյան ՀՀ Տավուշի մարզի Չինարի գյուղից դեպի հարավ արեւելք ընկած պետական սահմանի հատվածում, ադրբեջանական զորքերը ձեռնարկել են դիվերսիոն ներթափանցման փորձ։ ՀՀ զինված ուժերը մարտի են բռնվել հակառակորդի հետ. «Կիրառվում է դիպուկահարների եւ նռնականետերի կրակ, որը շարունակվում է։ ՀՀ Զինված ուժերը լիովին վերահսկում են իրավիճակը՝ կանխելով հակառակորդի ոտնձգությունները»,-նշել է նա:
