Ռուսաստանն առաջիկա 5 տարիներին կարող է Հայաստան մատակարարել Sukhoi SuperJet 100 10 օդանավից ոչ ավելի, առաջին մատակարարումները 2019 թվականին կարող են կազմել 2-ից մինչեւ 4 օդանավեր: Այս մասին հայտնել է Ռուսաստանի արդյունաբերության եւ առեւտրի նախարար Դենիս Մանտուրովը, փոխանցում է «ՌԻԱ Նովստի»-ն:
«Խոսքը 5 տարվա սահմաններում ընդհանուր առմամբ 10 օդանավից ոչ ավելի մատակարարումների մասին է: Կսկսվի 2-ից մինչեւ 4 օդանավից: Եթե այս տարի հասկանալի ծրագիր կազմենք, դրա լուծումները գտնենք, այդ թվում՝ աղբյուրների մասով, ապա արտադրության ցիկլը հաշվի առնելով՝ լավագույն դեպքում մատակարարումը կկատարվի 2018 թվականի վերջին, 2019-ի սկզբին: Կարծում եմ՝ ավելի իրատեսական է 2019-ին, որովհետեւ եւ՛ 2017, եւ՛ 2018 թվականները պատվերների եւ մատակարարումների բաղադրիչների տեսակետից փակված են»,- ասել է նախարարը:
Հայաստանին Sukhoi SuperJet 100 օդանավերի մատակարարումների քննարկումների մասին Մանտուրովն ասել է անցյալ տարվա նոյեմբերին:
Sukhoi Superjet 100-ը (SSJ100) ուղեւորատար օդանավ է՝ հաշվարկված մոտ 4,4 հազար կմ հեռավորությամբ 98 ուղեւոր փոխադրելու համար: Օդանավն առաջին թռիչքը կատարել է 2008 թվականի մայիսին, կոմերցիոն շահագործման է հանձնվել 2011 թվականին: