Ղարաբաղյան հակամարտության գոտում ռազմական գործողությունների վերսկսման հավանականությունը Հայաստանի պաշտպանության նախարարը զրոյից հարյուր տոկոս է գնահատում: Այս մասին Վիգեն Սարգսյանը հայտարարել է ռուսական լրատվամիջոցների լրագրողների հետ հանդիպման ժամանակ եւ բացատրել. Բաքուն, ցավոք, երկարաձգում է հակամարտության լուծումը՝ մեծացնելով սպառազինությունը, հակահայկական, հայատյաց հռետորաբանություն օգտագործելով բոլոր մակարդակներով:
Վիգեն Սարգսյանը հիշեցրել է, որ Բաքուն երկար տարիներ հսկայական միջոցներ է ծախսում՝ նորագույն սպառազինություն ձեռք բերելու համար: Դա հանգեցրեց տարածաշրջանում սպառազինության հավասարակշռության խախտման, բայց ուժերի հասավարակշռությունը պահպանվում է: Պատրաստվո՞ւմ է, արդյոք, Հայաստանը Ռուսաստանից նոր «Իսկանդեր»-ներ ձեռք բերել: Սպառազինության տեսակների մասին, ըստ Վիգեն Սարգսյանի, խոսել չի կարող. ըստ հնարավորության՝ դրանք ներկայացվում են ռազմական շքերթների ժամանակ: Բայց հավաստել է, որ Հայաստանը շարունակում է զարգացնել եւ արդիականացնել զինված ուժերը:
Իսկ որտե՞ղ է իրեն տեսնում ապրիլի 2-ի ընտրություններից հետո: Վիգեն Սարգսյանը հույս է հայտնել, որ ընտրություններից հետո, ՀՀԿ-ի հաղթանակի դեպքում, կմնա պաշտպանության նախարարի պաշտոնում:
Ընտրություններից երեք օր առաջ նախընտրական քարոզչությունն են ամփոփել նաեւ «Ելք» դաշինքն ու ՀՅԴ-ն: «Ելք»-ի ներկայացուցիչներն ընտրողներին «դուխով» քվեարկության գնալու կոչ են արել: Արամ Սարգսյանը գոհ է նախընտրական արշավի ընթացքից. ասում է՝ դաշինքի անդամների դեմքերի արեւայրուքը ապացուցում է, թե որքան լավ են աշխատել. այդ ընթացքում շուրջ կես միլիոն մարդու են հանդիպել: Նախընտրական շրջանում հրապարակված սոցիոլոգիական հարցումների արդյունքներին Սարգսյանն այնքան էլ չի հավատում:
Երթի մասնակիցների վերջնակետը Կենտրոնական ընտրական հանձնաժողովն էր: Այստեղ արտահերթ նիստ էին հրավիրել եւ քննարկում էին «Ելք»-ի դիմումը՝ խորհրդարանական ընտրություններին մասնակցության համար ՀՀԿ-ի գրանցումը ուժը կորցրած ճանաչելու մասին: Դիմումի վերաբերում է քարոզչության ընթացքում դպրոցների եւ մանկապարտեզների տնօրենների դերին: Դրա համաձայն՝ «նախընտրական քարոզչության ընթացքում նրանք օգտագործել են դպրոցների ու մանկապարտեզների գույքը, օգտվել այն փաստից, որ ուսանողներն ու ծնողները կախման մեջ են տնօրեններից: Արդյունքում խախտվել են նախընտրական քարոզչության հիմնական սկզբունքները»:
Իսկ Դաշնակցությունը համերգ-հանրահավաք էր կազմակերպել «Ազատության» հրապարակում: Ելույթի ընթացքում Արմեն Ռուստամյանը, թեեւ ոչ անվանական, բայց հստակ ակնարկով անդրադառնալով Լեւոն Տեր-Պետրոսյանի հայտնի թեզին, որ առանց տարածքներ զիջելու անհնար է խաղաղություն ապահովել եւ զարգանալ, հայտարարեց, որ Հայաստանն ի վիճակի է զարգանալ՝ առանց իր ռազմավարական շահերը զիջելու:
Հանրահավաքն ավարտվել է համերգով: Դաշնակցության հրապարակային հավաքներին ավանդաբար ելույթ ունեցողներին այսօր միացել է նաեւ Գոռ Սուջյանն ու պրեմիերա ներկայացրել:
Կառավարությունը կփորձի լուծել բազմազավակ եւ երիտասարդ ընտանիքների բնակարանային խնդիրը: Հարցը քննարկվել է գործադիրի այսօրվա նիստում: Քաղաքաշինության պետական կոմիտեն ուսումնասիրել է անավարտ շենք-շինությունները եւ դրանք ավարտին հասցնելու լուծումներ առաջարկել: Սոցիալական հարցերի նախարարությունն էլ ծանր կացարանային պայմաններում բնակվող ընտանիքների տվյալներ կներկայացնի:
Բազմաթիվ համայնքներում էլ ջեռուցման խնդիր կա, բայց որոշ բնակավայրերում գազաֆիկացումը պարզապես հնարավոր չէ: Վարչապետն առաջարկում է քննարկել դրանք արեւային էներգիայով ապահովելու հնարավորությունը: Կարեն Կարապետյանն աշխատանքային այցերով եւ նախընտրական քարոզչության շրջանակում վերջերս ավելի հաճախ էր մարզերում լինում: Դժգոհ է ճանապարհներից՝ թե՛ միջպետական, թե՛ մարզային, թե՛ համայնքային: Այս հարցով էլ հանձնարարական ուներ:
Արտեմ Ասատրյանն էլ ներկայացրել է զբաղվածության խնդիրը լուծելուն ուղղված ծրագիրը: Կառավարությունը գործատուներին ամսական 50-200 հազար դրամի փոխհատուցում կվճարի՝ ոչ մրցունակ անձանց աշխատանքի ընդունելու համար:
Պետությունը կշարունակի նաեւ շարունակել սուբսիդավորել ֆերմերային տնտեսությունների վարկերը: 2011-2016 թվականներին 4.7 մլրդ դրամի սուբսիդավորում է տրամադրվել, բայց դա բավարար չէ. Հայաստանում գյուղատնտեսական վարկերը 10 անգամ ավելի են: Կարեն Կարապետյանը վարկերի արդյունավետության մասին հաշվետվություն է պահանջել:
Կառավարության նիստից հետո էլ լրագրողները Սուրեն Կարայանից հետաքրքրվել են, թե որքանո՞վ է իրատեսական 3 մլրդ 200 մլն դրամի ներդրումներ ներգրավելու մասին վարչապետի հայտարարությունը: Նախարարը հավաստել է, որ իրատեսական է եւ հիմնավորված: Ներդրումների մասին նախընտրական խոստումների հարցն ուղղել են նաեւ ֆինանսների նախարարին: Վարդան Արամյանը կերազեր, որ Գագիկ Ծառուկյանի հայտարարած 15 մլրդ դոլարի ներդրումները Հայաստան հասնեին, բայց դա գրեթե անհնար է:
Դոլարի անկումը կանգ է առել, իսկ եվրոն շարունակել է նվազել: Արդյունքում մարտի 30-ին դոլարի փոխարժեքը կազմել է 483 դրամ, եվրոյինը՝ 519, ռուբլունը՝ 8 դրամ 59 լումա, ֆունտինը՝ 601 դրամ:
Մարտի 31-ին հանրապետության տարածքում ջերմաստիճանը 5-7 աստիճանով կնվազի: Գիշերը սպասվում է առանց տեղումների եղանակ, իսկ ցերեկը որոշ շրջաններում տեղումներ կլինեն, լեռնային գոտիներում՝ թաց ձյան տեսքով: Երեւանում վաղը տեղումներ չեն սպասվում: Մայրաքաղաքում գիշերը կդիտվի +3+5, ցերեկը՝ +14+16 աստիճան տաքություն:
