Արցախում վիրավորված 19-ամյա Թաթուլ Հարությունյանի վիճակը շարունակում է ծանր մնալ: Այս մասին մեր թղթակցին հայտնել է Արցախի Պաշտպանության նախարարության մամուլի խոսնակ Սենոր Հասրաթյանը: Ժամկետային զինծառայող Թաթուլ Հարությունյանը վիրավորում է ստացել երեկ երեկոյան, հակառակորդի արձակած կրակոցից: Նա Ստեփանակերտի զինվորական հոսպիտալում է:

Վարչապետ Կարեն Կարապետյանը կարծում է, որ երկիրը չի կարող զարգանալ, եթե մարզերում հստակ չգիտեն՝ ինչ է անհրաժեշտ համայնքների զարգացման համար: Վարչապետը համայնքների ղեկավարներին հանձնարարել էր զարգացման ծրագրեր ներկայացնել կառավարություն: Արդյունքներից այնքան էլ գոհ չէ: Իսկ այսօր ընդունել է զարգացման լավագույն 20 ծրագրերը ներկայացրած համայնքների ղեկավարներին: Նրանք խոսել են իրենց կարիքների մասին ու մանրամասնել՝ ինչ արդյունք են ակնկալում ներկայացրած ծրագրերի իրականացումից: Ծրագրերից մեկը զարմացրել ու ոգեւորել է վարչապետին. նման առաջարկներ է ակնկալում:

Կարեն Կարապետյանն ասում է՝ համայնքների ղեկավարները պետք է շահագրգռված լինեն, որպեսզի իրենց համայնքների շուրջ ձեւավորվի բիզնեսի ներգրավման միջավայր, համայնքներն էլ աստիճանաբար դառնան ինքնաբավ: Հետեւողական է լինելու, որ հասնեն դրան:

Ոստիկանության Երեւանի ՊՊԾ գնդի գրավման օրերին զանգվածային անկարգություններին մասնակցելու մեջ մեղադրվող Արարատ Խանդոյանն այսօր աչքի վիրահատության է ենթարկվել: Նրա շահերի պաշտպանի տեղեկացմամբ՝ վիրահատությունը նորմալ է անցել, դրանից հետո նրան «Նուբարաշեն» քրեակատարողական հիմնարկ են տեղափոխել: Խանդոյանն աչքի վնասվածքը ստացել է հուլիսյան դեպքերի ժամանակ: Հուլիսից էլ նա կալանքի տակ է:

Իսկ գունդը գրաված «Սասնա ծռեր» խմբի անդամ Հովհաննես Հարությունյանն այսօրվանից ստացիոնար բուժում է ստանալու Հայկական կարմիր խաչի վերականգնողական կենտրոնում: Հարությունյանի առողջական վիճակը գնահատելու նպատակով բժշկական կոնսիլիում էր կազմակերպվել եւ որոշվել նրան տեղափոխել համապատասխան վերականգնողական կենտրոն՝ բուժման: Հովհաննես Հարությունյանը ոտքի ծանր վիրավորում էր ստացել ոստիկանության Երեւանի ՊՊԾ գնդի տարածքում:

Ճանապարհային ոստիկանությունը տեղեկացրել է, որ ապրիլի 23-ին եւ 24-ին Երեւանում մի շարք ավտոճանապարհներին տրանսպորտային միջոցների երթեւեկությունը կդադարեցվի: Ցեղասպանության զոհերի հիշատակի օրվա միջոցառումներով պայմանավորված՝ այդ օրերին երթեւեկության համար փակ կլինեն հետեւյալ փողոցները.

Ապրիլի 23-ին ժամը 20-ին Ֆրանսիայի հրապարակից ջահերով երթի մեկնարկի կապակցությամբ փակ կլինեն Բաղրամյան պողոտան, Կիեւյան փողոցը եւ Ծիծեռնակաբերդի հուշահամալիրին հարող հատվածները:

Ապրիլի 24-ի առավոտյան ժամը 6:30-ից մինչեւ 23-ն է փակ կլինեն Լենինգրադյան-Աթենք փողոցների խաչմերուկից՝ Աթենքի փողոցը մինչեւ Աթենքի փողոց-Իսակովի պողոտա, ինչպես նաեւ Հրազդանի կիրճից դեպի Իսակովի պողոտա հատվածները:

Դոլարը շարունակում է էժանանալ, փոխարենը կտրուկ թանկացել է ֆունտը: Ապրիլի 19-ին դոլարի փոխարժեքը կազմել է 485 դրամ, եվրոյինը՝ 520, ռուբլունը՝ 8 դրամ 66 լումա, ֆունտինը՝ 623 դրամ:

Ապրիլի 20-ին հանրապետության հյուսիսային շրջաններում սպասվում է անձրեւ եւ ամպրոպ: Օդի ջերմաստիճանն էապես չի փոխվի: Երեւանում վաղը ցերեկը տեղումներ չեն լինի, երեկոյան սպասվում է կարճատեւ անձրեւ եւ ամպրոպ: Մայրաքաղաքում գիշերը կդիտվի +8+10, ցերեկը՝ +22+24 աստիճան տաքություն: