2008 թվականի մարտի 1-ի դեպքերից հետո որտե՞ղ էր թաքնվում Նիկոլ Փաշինյանը: Երեւանի քաղաքապետի թեկնածուն այսօր ինքն է բացահայտել. Քանաքեռի «Շամպայն» կոչվող թաղամասի շենքերից մեկում: Փաշինյանի հայտարարությունն անակնկալի է բերել նույնիսկ քարոզարշավին մասնակցող «Ելք» դաշինքի որոշ անդամների: Մեկ այլ շենքի բակում էլ մի կին հայտարարել է, թե բոլորը ստում են, ընտրությունների էլ չի գնալու: Նիկոլ Փաշինյանը հետաքրքրվել է, թե ում է հավատում: Կնոջ պատասխանը զվարճացրել է Փաշինյանին:
«Երկիր Ծիրանիի» քարոզիչներն այսօր մայրաքաղաքի կենտրոնական փողոցներում են շրջել: Երեւանցիներին առաջարկել են ծանոթանալ «Երեւանի սիրուն աղջկա» հետ ու օգնել գրավել Արգիշտի 1-ը: Զարուհի Փոստանջյանի համախոհները մայրաքաղաքի բնակիչներին հորդորել են հրաժարվել կաշառքից ու դադարել ստորացված ապրել: Իրենք, հավաստում են, կաշառք չեն բաժանելու:
Իսկ Տարոն Մարգարյանն այսօր Աջափնյակում էր: Լրագրողները գործող քաղաքապետին հարցրել են, թե ինչո՞ւ է վախենում մրցակիցների հետ բանավեճի մասնակցելուց: Տարոն Մարգարյանը պատասխանել է նաեւ Երեւանի բյուջեի հաշվին հարստանալու մասին մրցակիցների հայտարարություններին:
Երեւանի թիվ 147 հիմնական դպրոցը կանվանակոչվի Ռոբերտ Աբաջյանի անունով. Արցախի հերոսը հենց այս դպրոցում է սովորել: Որոշումը կայացվել է Երեւանի ավագանու այսօրվա նիստում: Ռոբերտ Աբաջյանը զոհվել է 2016 թվականի ապրիլի 2-ի գիշերը՝ Մարտակերտի ուղղությամբ տեղակայված դիրքը պաշտպանելիս: Կապիտան Արմենակ Ուրֆանյանի ղեկավարած վաշտի փոքրաթիվ զինվորները ռազմական գործողությունների առաջին գիշերը մի քանի անգամ հետ են շպրտել հակառակորդի ուժերին: Կապիտան Ուրֆանյանն ու շարքային Քյարամ Սլոյանը զոհվել են արկի պայթյունից, շարքային Անդրանիկ Զոհրաբյանը վիրավորվել է, ինչից հետո Ռոբերտ Աբաջյանն իր վրա է վերցրել դիրքի պաշտպանությունն ու միայնակ շարունակել մարտը: Երբ հակառակորդը դիտակետերը շրջանցելով՝ ներթափանցել է դիրք, Ռոբերտ Աբաջյանը վիրավորվել է: Վիրավորված Անդրանիկին իր հետ տանելով՝ Աբաջյանը նահանջել է մինչեւ վերջին խրամախորշ, կապ հաստատել գումարտակի հրամանատարի հետ, մարտի մասին կարեւոր տեղեկություններ հաղորդել: Երբ հակառակորդը մոտեցել է, Ռոբերտը պարզել է իր մոտ մնացած միակ նռնակը՝ հանձնվելու նշան անելով, բայց պայթեցրել է իրեն ու հակառակորդի մի քանի զինվորների:
Երեկ Արցախի մարտական դիրքերից մեկում մահացած հայտնաբերված 19-ամյա զինծառայող Կարեն Ավետիսյանը Երեւանի բնակիչ էր: Նա բանակ էր զորակոչվել անցյալ տարվա հուլիսին: Կարենն ընտանիքի միակ որդին էր, մեկ քույր ունի: Քննություն է տարվում՝ պարզելու նրա մահվան հանգամանքները: Նշենք, որ զինծառայողին հայտնաբերել են ծնոտի շրջանում մահացու հրազենային վնասվածքով: Նախնական տվյալներով՝ Ավետիսյանն ինքն է իրեն վնասվածք հասցրել իրեն ամրակցված գնդացրով:
Հարազատները, սակայն, համաձայն չեն առաջ քաշված վարկածին: Կարենի մորաքույրը մեր թղթակցի հետ զրույցում հայտարարել է, որ «9 ամսվա ծառայող զինվորը չէր կարող զենքի հետ անփույթ վարվել»: Ալինա Աբրահամյանի խոսքով՝ Կարենը գնդացրորդ էր, բայց ստացած վնասվածքը գնդացրի փամփուշտից հասցված վիրավորում չի եղել: Երիտասարդը գոհ է եղել ծառայությունից, ծառայակիցների հետ ոչ մի խնդիր չի ունեցել: Հիմա հարազատներին մնում է միայն սպասել փորձաքննությունների ավարտին:
Ծիծեռնակաբերդում այսօր տեղի է ունեցել ամենամյա «Ծաղկահավաք» միջոցառումը: Այս օրերին անմար կրակի մոտ բերված ծաղիկներին արդեն մի քանի տարի է՝ նոր կյանք են տալիս: Ծաղիկները հավաքում են, ցողուններն առանձնացնում ծաղկաթերթերից: Ցողուններից պարարտախառնուրդ է սարքվում, իսկ ծաղկաթերթերը վերամշակում եւ թուղթ են ստանում: Այն նվիրաբերում են Ցեղասպանության թանգարան-ինստիտուտին:
Երեւանում Nissan մակնիշի ավտոմեքենայում այսօր տղամարդու դի է հայտնաբերվել: Պարզվել է, որ մահացածը Երեւանի 31-ամյա բնակիչ Արմեն Ծատուրյանն է: Դատաբժշկի նախնական եզրակացության համաձայն՝ նա մահացել է սրտի կաթվածի հետեւանքով: Ծատուրյանը ծառայում էր պաշտպանության նախարարության Նուբարաշենի զորամասում՝ որպես ինժեներական ծառայության պետ, կոչումով մայոր էր:
Իսկ Լոռում մարզում արտակարգ դեպք է գրանցվել: «Փաշիգյուղ» կոչվող հանդամասում ինքնությունը չպարզված անձի հոշոտված դի է հայտնաբերվել: Դիակն անճանաչելի է, իրավասու մարմինները փորձում են պարզել մահացածի ինքնությունը:
Ապրիլի 26-ին դոլարն ու եվրոն թանկացել են: Արդյունքում դոլարի փոխարժեքն այսօր կազմել է 484 դրամ, եվրոյինը՝ 528, ռուբլունը՝ 8 դրամ 57 լումա, ֆունտինը՝ 621 դրամ:
Ապրիլի 27-ին հանրապետությունում սպասվում է առանց տեղումների եղանակ: Օդի ջերմաստիճանը 6-8 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +1+3, ցերեկը՝ +20+22 աստիճան տաքություն:
