Հայաստանի նոր խորհրդարանի առաջին նիստը կնշանակվի մայիսի 18-ին: Ապրիլի 28-ին լրագրողների հետ զրույցում այս մասին ասաց Կենտրոնական ընտրական հանձնաժողովի նախագահ Տիգրան Մուկուչյանը՝ «Կոնգրես-ՀԺԿ» դաշինքի ապրիլի 2-ի խորհրդարանական ընտրությունների արդյունքներն անվավեր ճանաչելու հայցով ՍԴ բացասական որոշումը հրապարակելուց հետո:
Նրա խոսքով՝ մանդատների բաշխումն արդեն կատարվել է, այսինքն՝ որոշված է, թե յուրաքանչյուր կուսակցությունը քանի մանդատ է ստանալու: «Հիմա արդեն արձանագրություն կկազմվի այն պատգամավորների անվամբ, որոնք մանդատ կստանան: Մենք այս մասին կուսակցություններին կտեղեկացնենք սահմանված ժամկետում, որպեսզի համամասնական ցուցակներում ընդգրկված մարդիկ ցանկության դեպքում մանդատից հրաժարվելու դիմում ներկայացնեն եւ դրա համար ժամանակ ունենան»,- նշեց Մուկուչյանը:
ԿԸՀ նախագահը հայտնեց, որ իրենք մանդատից հրաժարվելու դիմումներ դեռեւս չեն ստացել՝ ենթադրելով, որ դա պայմանավորված էր Սահմանադրական դատարանում «Կոնգրես-ՀԺՇ» դաշինքի հայցի քննությամբ: