Երեւանի ավագանու ընտրություններում «Ելք» դաշինքի հաղթանակով ՀՀԿ միահեծան իշխանությանը շատ լուրջ հակահշիռ կստեղծվի ոչ միայն Երեւանի, այլեւ ողջ Հայաստանի մասշտաբով: Այս մասին, այսօր՝ մայիսի 1-ին, քարոզարշավի ընթացքում լրագրողների հետ զրույցում նշել է «Ելք» դաշինքի կողմից Երեւանի քաղաքապետի թեկնածու Նիկոլ Փաշինյանը:
Դիտարկմանը, որ Տարոն Մարգարյանն ասել է, որ փնտրել ու չի գտել քաղաքապետի մյուս թեկնածուների նախընտրական ծրագրերը, Փաշինյանն արձագանքեց. «Դա խոսում է Տարոն Մարգարյանի թիմի աշխատունակության մասին: Դրա համար ցանկացած քաղաքացուց կպահանջվի 1,5 րոպե»:
Հարցին, թե ծանո՞թ է քաղաքապետի թեկնածու Տարոն Մարգարյանի նախընտրական ծրագրին, Փաշինյանը պատասխանեց. «Ես ծանոթ եմ նրանց արածներին: Ես ծանոթ եմ այն ծրագրերին, որոնք նրանք նախատեսել են իրականացնել, եւ չեն իրականացրել: Տարոն Մարգարյանի նախորդ անգամվա նախընտրական ծրագրի 60 տոկոսից ավելին չի իրականացվել»:
Դիտարկմանը, որ ԱԺ ընտրություններում պարտված թեկնածու Առաքել Մովսիսյանը հայտարարել է, թե Երեւանի ավագանու ընտրություններում աջակցելու է Տարոն Մարգարյանին, թեեւ ինքը Երեւանի բնակիչ չէ, Փաշինյանն ասաց. «Քաչալը ճար ունենար, իր գլխին կաներ: Ինչքան շատ Առաքել Մովսիսյանը ներգրավված լինի Տարոն Մարգարյանի քարոզարշավին... խնդրում եմ, թող մաքսիմալ ակտիվ նա մասնակցի Տարոն Մարգարյանի քարոզարշավին: Դա եւս մի լուրջ փաստարկ կլինի եւ շատ մեծ հաջողություն կբերի, մեր ձայների թիվը էապես կմեծանա: Ուզում եմ ձեր ընթերցողներին հիշեցնել, որ Առաքել Մովսիսյանը Շմայսն է»:
