Երեւանի ավագանու ընտրությունների ընթացքում մինչեւ այս պաը որեւէ գրավոր դիմում-բողոք չի ներկայացվել ոչ ԿԸՀ, ոչ էլ տարածքային ընտրական հանձնաժողովներ: Այս մասին, այսօր՝ մայիսի 15-ին, լրագրողների հետ զրույցում նշեց ԿԸՀ նախագահ Տիգրան Մուկուչյանը:

Նրա խոսքով, ասյօրվանից եւս ներկայացված է ժամկետ՝ դիմում-բողոքներ ներկայացնելու համար, այդ թվում վերահաշվարկի վերաբերյալ. «Երբ նման դիմումներ ստացվեն, բոլորը քննության առարկա կդառնան: Դիմումները կարող են ներկայացվել մինչեւ այսօր ժամը 18-ը եւ վաղն առավոտյան ժամը 9-11-ը: Այլ անձի փոխարեն քվեարկելու վերաբերյալ բողոք դիմումների համար մեկ օր ավելի ժամկետ է նշանակված»:

Տիգրան Մուկուչյանը նշեց, որ Երեւանի ավագանու ընտրությունների վերջնական արդյունքների ամփոփումը տեղի կունենա ընտրությունների 7-րդ օրը, այսինքն մայիսի 21-ին: Նա ասաց, որ ընտրությունների օրվա ընթացքում եղել են ահազանգեր, բոլորը փորձել են ուսումնասիրման առարկա դարձնել, որոնք կամփոփեն եւ կներկայացնեն: «Թե քանակական, թե բովանդակային առումով այդ հաղորդումներն աննախադեպ քիչ էին, բովանդակային առումով եւս դրանք վերաբերում էին առանձին դեպքերի, արտառոց ահազանգ չի ստացվել»:

Մուկուչյանի խոսքով, ոստիկանությունն ու դատախազությունը եւս զբաղվել են այդ խնդիրներով. իրավապահ մարմինները եւս արձագանքում են նման հրապարակումներին ու ահազանգերին: