«Ծառուկյան» խմբացկության պատգամավոր Վարդեւան Գրիգորյանի 26-ամյա որդու ինքնասպանության դեպքի առթիվ հարուցված քրեական գործը կասեցվել է: Այս մասին այսօր՝ մայիսի 22-ին, NEWS.am-ի հետ զրույցում ասաց ՀՀ քննչական կոմիտեի նախագահի խորհդական Սոնա Տռուզյանը:
Նա նշեց, որ Արշակ Գրիգորյանի ինքնասպանության դեպքի առթիվ հարուցված քրեական գործը կասեցվել է որպես մեղադրյալ ներգրավման ենթակա անձը հայտնի չլինելու հիմքով: Նաեւ քրեական գործի նյութերով հարուցվել է նոր քրեական գործ՝ 235-րդ հոդվածի հատկանիշներով՝ ապօրինի կերպով զենք եւ փամփուշտներ իրացնելը:
Նախաքննությունը շարունակվում է, ոստիկանության համապատասխան ստորաբաժանումներին օպերատիվ հետախուզական միջոցառումներ իրականացնելու հանձնարարություն է տրվել:
Ավելի վաղ տեղեկացրել էինք, որ ՀՀ քննչական կոմիտեի Շիրակի մարզային քննչական վարչությունում հարուցվել է քրեական գործ` Արշակ Գրիգորյանի մահվան դեպքի առթիվ՝ ՀՀ քրեական օրենսգրքի 110-րդ հոդվածի 1-ին եւ 235-րդ հոդվածի 1-ին մասերով (ինքնասպանության հասցնելը):
2016թ. սեպտեմբերի 20-ին Գյումրիի բժշկական կենտրոնից ահազանգ է ստացվել, որ գլխի շրջանում հրազենային վնասվածքով իրենց մոտ է տեղափոխվել Արշակ Գրիգորյանի դիակը:
Ահազանգի հիման վրա ձեռնարկված անհետաձգելի քննչական գործողությունների արդյունքում պարզվել է, որ երիտասարդը հրազենային վնասվածքն ստացել է իրենց առանձնատան նկուղում արձակված կրակոցի արդյունքում։ Դեպքի վայրի զննությամբ հայտնաբերվել են արյան հետքեր, «Մակարով» տեսակի ատրճանակ՝ լիցքավորված փամփուշտներով, 1 պարկուճ։