Ըստ Cornerstone Capital Group-ի անցկացրած նոր հետազոտության՝ առաջիկա 10 տարիներին կա հավանականություն, որ 6-7․5 մլն աշխատատեղեր կփոխարինվեն ավտոմատիզացիայի այս կամ այն տեսակով, հայտնում է Mignews-ը։
Դա կազմում է առեւտրի ոլորտում գոյություն ունեցող աշխատուժի առնվազն 38 տոկոսը։ Առեւտրի ոլորտում ավտոմատիզացման հետեւանքով աշխատատեղերի ավելի մեծ կորուստ կլինի, քան արտադրության ոլորտում։
«Գանձապահները համարվում են տնտեսական ոլորտի ամենահեշտ ավտոմատիզացվող աշխատատեղերը»,- ասվում է զեկույցում։ Ու այդ աշխատատեղերի կորուստից ամենաշատը կանայք են տուժելու, քանի որ գանձապահների մոտ 73 տոկոսը կանայք են։
Խանութներում վաճառողների մի մասը նույնպես կփոխարինվի ապրանքի որոնման ու ընտրման ավտոմատիզացված տարբերակներով՝ օրինակ սմարթֆոնների կամ սենսորային էկրաններով համակարգիչների միջոցով։
Նոր տեխնոլոգիաների կիրառումից մանրածախ առեւտրի ոլորտն արդեն իսկ հսկայական փոփոխությունների է ենթարկվել ու այս տարի հայտարարվել է մոտ 3300 խանութների փակման մասին։