ՀՀ Վարչական դատարանում այսօր՝ մայիսի 26-ին, տեղի է ունենում «Երկիր Ծիրանի» կուսակցության նախագահ Զարուհի Փոստանջյանի՝ Երեւանի ավագանու ընտրությունների արդյունքները վիճարկելու պահանջով նիստը:
Երբ Զարուհի Փոստանջյանը դատարանում ներկայացնում էր իր հայցադիմումնը, դատարանը թույլ չտվեց նրան շարունակել հայցադիմումի ընթերցումը: Զարուհի Փոստանջյանը, սակայն, նշեց, որ դատարանն իրավունք չունի ընդհատելու իրեն՝ նշելով, որ դատարանը պատվեր է կատարում: Զարուհի Փոստանջյանին պաշտպանեց դատական նիստերի դահլիճում գտնվող նրա համակիրներից մի կին: Դատարանը որոշում կայացրեց դատական սանկցիա կիրառել նրա նկատմամաբ եւ դուրս հրավիրեց նիստերի դահլիճից: Սակայն, կինը չենթարկվեց դատարանի պահանջին: Նիստը նախագահող դատավորները ընդմիջում հայտարարեցին եւ հեռացան նիստերի դահլիճից:
Ավելի վաղ տեղեկացրել էինք, որ «Երկիր Ծիրանի» կուսակցությունը հայցադիմում է ներկայացրել ՀՀ վարչական դատարան ընդդեմ ՀՀ կենտրոնական ընտրական հանձնաժողովի՝ խնդրելով անվավեր համարել ՀՀ ԿԸՀ-ի Երեւանի ավագանու 2017 թվականի մայիսի 14-ի ընտրությունների արդյունքների վերաբերյալ 21.05.2017 թվականի թիվ 271-Ա եւ Երեւանի ավագանու 2017 թվականի մայիսի 14-ի ընտրությունների արդյունքներն ամփոփելու մասին 21.05.2017 թվականի 272-Ա որոշումները եւ, որպես անվավերության հետեւանք, կիրառել Երեւանի ավագանու նոր ընտրությունների նշանակումը:
