ՊԲ հյուսիսային ուղղությամբ տեղակայված զորամասերից մեկի պահպանության տեղամասում հակառակորդի կողմից արձակված կրակոցից զոհված 21-ամյա Արմեն Հարությունյանը նշանված էր: ԼՂՀ Մարտակերտի շրջանի Հաթերք համայնքի ղեկավար Ռադիկ Գրիգորյանը NEWS.am-ի հետ զրույցում ասաց, որ Արմենը մեկ ու կես ամիս առաջ էր նշանվել:
Համայնքի ղեկավարի խոսքով, Արմենն ու հայրը ծառայում էին նույն զորամասում, նա սոցիալական ծանր պայմաններում ապրող ընտանիքից էր:
«Այդ տունը 99 թվականին վառվեց, հիմա մի քիչ են ուղղակի վերանորոգել»,-ասաց նա:
Ավելի վաղ տեղեկացրել էինք, որ Արմեն Հարությունյանը ԼՂՀ Մարտակերտի շրջանի Հաթերք գյուղի բնակիչ էր: Պայմանագրային զինծառայողը ծառայության էր անցել 8 ամիս առաջ: Նա ունի իրենից փոքր եղբայր:
Ավելի վաղ տեղեկացրել էինք, որ մայիսի 26-ին՝ ժամը 11:45-ի սահմանում մահացու վիրավորում է ստացել պայմանագրային զինծառայող 21-ամյա Արմեն Ռաֆիկի Հարությունյանը:
Դեպքի մանրամասները պարզելու համար կատարվում է քննություն: