Զինվորական հոսպիտալում այսօր պայմանագրային զինծառայող է մահացել: Պաշտպանության նախարարի մամուլի խոսնակ Արծրուն Հովհաննիսյանը հայտնել է, որ Նարեկ Ջիվանի Մխիթարյանն առողջական խնդիրներ ուներ: Նա պարանոցի կիստայի վիրահատական միջամտության է ենթարկվել, սակայն զինծառայողի կյանքը փրկել չի հաջողվել: Մահվան պատճառը դեռեւս պարզ չէ:
Երկօրյա այցով Հայաստան ժամանած Տաջիկստանի նախագահը հանդիպել է Սերժ Սարգսյանին: Նախագահականում դիմավորման պաշտոնական արարողությունից հետո երկու երկրների ղեկավարներն առանձնազրույց են ունեցել, ինչին հետեւել են հայ-տաջիկական բարձր մակարդակի բանակցությունները:
Բանակցությունների արդյունքներով մի շարք երկկողմ համաձայնագրեր են ստորագրվել, իսկ երկու երկրների նախագահները հանդես են եկել մամուլի ասուլիսով: Էմոմալի Ռահմոնն այսօր եղել է նաեւ Հայոց ցեղասպանության զոհերի հուշահամալիրում:
Ազգային ժողովի պատգամավորներն այսօր արյուն են հանձնել: Արյան դոնորի միջազգային օրվա առիթով արյունատվության ակցիան հենց խորհրդարանում կազմակերպել էր Յոլյանի անվան արյունաբանական կենտրոնը: Արա Բաբլոյանն ասում է՝ լավ օրինակ են ծառայում քաղաքացիների համար: Արյուն հանձնող Ազգային ժողովի նախագահը նաեւ Նիկոլ Փաշինյանին հրավիրել է տեղ գրավել իր կողքին: Արյունաբանական կենտրոնի տնօրեն Սմբատ Դաղբաշյանն ասում է՝ արյան դոնորների թիվը Հայաստանում քիչ է, դրա կարեւորության մասին քարոզելու կարիք կա:
Արմավիրի մարզի մի քանի գյուղերում այսօր կրկին լարված իրավիճակ է եղել: Գյուղացիները փակել են Էջմիածին-Աշտարակ ավտոճանապարհի՝ Մրգաստան գյուղի խաչմերուկը: Բողոքում են երկու օր առաջ տեղացած կարկուտի հետեւանքները վերացնելու հարցում պետության աջակցության բացակայությունից: Նրանք պահանջում են 2 տարով սառեցնել բանկերից վերցրած վարկերի վճարումները, հակակարկտային կայաններ տեղադրել գյուղերում, սուբսիդավորել հողի, ջրի վարձը: Գյուղնախարարությունն արդեն հաշվարկում է կարկուտի հասցրած վնասի չափը, հետո կուսումնասիրեն նաեւ աջակցության վերաբերյալ գյուղացիների դիմումները: Իսկ որոշում կընդունեն՝ ելնելով բյուջեի հնարավորություններից:
Նախօրեին վթարի ենթարկված Մոսկվա-Երեւան երկուղու ավտոբուսի տուժած ուղեւորները Հայաստանի քաղաքացիներ չեն: Հունիսի 13-ի առավոտյան Վորոնեժի մարզում Մոսկվա-Երեւան երթուղու ավտոբուսը ջրատարն էր ընկել: Պատահարի հետեւանքով 3 մարդ է տուժել, այդ թվում՝ 2 երեխա: Պարզվում է՝ ուղեւորափոխադրում իրականացնող «Դը Ռոյալ Լիդեր» ընկերության տնօրենն այս տարվա մարտին նույն ավտոբուսի համար վարչական տույժի է ենթարկվել: Ավտոբուսը միջպետական ոչ կանոնավոր փոխադրումներ է իրականացրել օրենքով սահմանված պահանջների խախտմամբ:
Միաժամանակ, Ռուսաստանում խստացրել են ուղեւորափոխադրում իրականացնող տրանսպորտային միջոցների վերահսկողությունը: Փակվել են մայրաքաղաք Մոսկվայից դեպի Ռուսաստանի այլ քաղաքներ, ինչպես նաեւ դեպի Երեւան ու Թբիլիսի ավտոբուսային մի շարք երթուղիներ: Ընդհանուր առմամբ, տարեսկզբից մինչեւ հիմա 168 ավտոբուս հանվել է երթուղիներից:
Արարատի մարզում տրանսպորտային խոշոր պատահար է տեղի ունեցել, Իրանի քաղաքացիներ են տուժել: 37-ամյա Ղոլամռասուլ Բարահուին Mercedes մակնիշի մեքենայով Երեւան-Մեղրի ավտոճանապարհին՝ Տիգրանաշենի ոլորաններում, կորցրել է մեքենայի կառավարումը. ավտոմեքենան կողաշրջվել է: Պատահարի հետեւանքով վարորդն ու նրա 41-ամյա եղբայրը մարմնական վնասվածքներով հիվանդանոց են տեղափոխվել: Մեքենան բարձված է եղել 10 տոննա գառան մսով:
Այսօր գործարկվել է Երեւանից «Զվարթնոց» օդանավակայան եւ հակառակ ուղղությամբ փորձնական երթուղին: Այն գործելու է շուրջօրյա, յուրաքանչյուր ժամը մեկ: Երթուղին գործարկելու հանձնարարականը վարչապետ Կարեն Կարապետյանինն է: Ավտոբուսները մեկնելու են Հանրապետության հրապարակի շատրվաններին հարակից տարածքից: Փոխադրավարձը մեկ ուղեւորի համար 300 դրամ է:
Դոլարի վերելքը շարունակվում է, այսօր էլ փոքր-ինչ էժանացել է ռուբլին: Ամերիկյան արժույթի փոխարժեքն արդյունքում կազմել է 482 դրամ, եվրոյինը՝ 540, ռուբլունը՝ 8 դրամ 46 լումա, ֆունտինը՝ 614 դրամ:
Հունիսի 15-ին շրջանների մեծ մասում տեղումներ են սպասվում, առանձին վայրերում հնարավոր է կարկուտ: Օդի ջերմաստիճանը վաղը 5-6 աստիճանով կնվազի, հետո նույնքան կբարձրանա: Երեւանում նույնպես վաղը տեղումներ կլինեն: Մայրաքաղաքում գիշերը կդիտվի +16+18, ցերեկը՝ +25+27 աստիճան տաքություն:
