Կառավարության նախաձեռնությամբ Ազգային ժողովն այսօր կրկին արտահերթ նիստ էր գումարել: Օրակարգը ծավալուն էր՝ կազմված 9 հարցից: Գյուղացիական տնտեսություններին օգնելու համար Սեւանա լճից լրացուցիչ ջրառի մասին օրինագիծը երկրորդ եւ վերջնական ընթերցմամբ արագորեն քննարկվեց եւ ընդունվեց:

Այնուհետեւ պատգամավորներն անցան բյուջեի կատարողականի հաշվետվության քննարկմանը: Մինչ իշխող կուսակցության ներկայացուցիչները փորձում էին արդարացնել 0.2% տնտեսական աճը՝ հիշեցնելով, որ 2016 թվականը Հայաստանի համար քաղաքական եւ տնտեսական առումով բարդ տարի էր, եւ այս ցուցանիշն անգամ կարելի է դրական արդյունք համարել, ընդդիմադիր «Ելք» եւ «Ծառուկյան» դաշինքների պատգամավորները պահանջում էին ոչ թե ներկայացնել թվեր, այլ հստակ փաստեր, թե ինչ է արվել՝ ժողովրդի վիճակը բարելավելու համար:

Նաիրա Զոհրաբյանը նախ հիշեցրեց վարչապետ Կարեն Կարապետյանի հայտարարության մասին:  Զոհրաբյանը կցանկանար այսօր այլ բովանդակությամբ հաշվետվություն լսել, մասնավորապես՝ բիզնեսը մենաշնորհից ազատելու, խոշոր բիզնեսը ստվերից դուրս բերելու մասին:

«Ծառուկյան» դաշինքից Գեւորգ Պետրոսյանն էլ դժգոհ էր, որ կարեւոր այս քննարկմանը կառավարության անդամների մեծ մասը ներկա չէ: Պատգամավորը նաեւ փորձեց հիմնավորել, թե ինչու է իրենց խմբակցությունն այսքան բուռն քննադատում բյուջեի կատարողականի հաշվետվությունը:

«Ելք»-ից Էդմոն Մարուքյանը նույնպես թվեր լսելու ցանկություն չուներ: Կարծում է, որ հաշվետվության մեջ պետք է տեղեկություններ լինեն այն մասին, թե ինչպես են լուծվել պետության ու հասարակության համար կարեւորագույն հարցեր: Խնդիրները Մարուքյանը ներկայացրեց Կարեն Կարապետյանի ոճով ու դպրոցական տարիները հիշելով՝ կառավարությանը գնահատական դրեց:

Բյուջեի կատարողականի մասին խոսելու փոխարեն Նիկոլ Փաշինյանը կրկին հետաքրքրվեց, թե 2018 թվականից ո՞վ է լինելու Հայաստանի վարչապետը: Նա ուշադրություն հրավիրեց այն հանգամանքի վրա, որ անցյալ շաբաթ կառավարություն գնացած նախագահ Սերժ Սարգսյանը Կարեն Կարապետյանի աթոռին էր նստել, իսկ վարչապետը տեղ էր զբաղեցրել նախարարական աթոռներից մեկին: «Ելք» խմբակցության ղեկավարը մինչեւ հիմա փորձում է նաեւ հասկանալ, թե ինչը չներեցին նախկին վարչապետ Հովիկ Աբրահամյանին: Ինչ վերաբերում է բյուջեի կատարողականին. Փաշինյանը չի հասկանում, թե ինչու դրա հաշվետվությունում ոչ մի խոսք չկա տնտեսության վրա ապրիլյան պատերազմի ազդեցության մասին:

Ազգային ժողով եկած Էդվարդ Նալբանդյանից էլ լրագրողները հետաքրքրվել են, թե երկու օր առաջ Ադրբեջանի իրականացրած սադրանքից հետո արդյո՞ք հայկական կողմը կհրաժարվի երկու երկրների արտգործնախարարների կամ նախագահների հանդիպումից: 

Հիշեցնենք, որ հուլիսի 4-ին Ադրբեջանը շփման գծում հերթական անգամ սադրանքի է դիմել: Հակառակորդը տարբեր զինատեսակներից խախտել է հրադադարի ռեժիմը՝ նաեւ ՏՌ-107 տիպի համազարկային հրթիռային կայանքներ կիրառելով: 2016 թվականի ապրիլյան պատերազմից հետո ադրբեջանական զինուժն առաջին անգամ է նման զինատեսակ կիրառել: Արցախի զինուժը պատասխան հարված է հասցրել ադրբեջանական Ալխանլու գյուղի կրակակետին, ինչի հետեւանքով գյուղի երկու բնակիչ է զոհվել՝ կին եւ երեխա: Հայկական կողմը կորուստներ չունի: Պատգամավոր Կորյուն Նահապետյանը կարծում է, որ Ադրբեջանը նման սադրանքներով կրկին լայնածավալ ռազմական գործողությունների է ձգտում. փորձում է գլխիվայր շրջել իրավիճակը եւ ցույց տալ, որ զինված գործողությունները հայկական կողմն է նախաձեռնում:

Կառավարությունը փորձելու է բարձրացնել ընտանիքների անապահովության գնահատման արդյունավետությունը: Վարչապետը կարծում է, որ հարկավոր է ուսումնասիրել ու հաշվի առնել ամեն ինչ՝ բանկային գործարքներից մինչեւ գույքային իրավունքների մասին տեղեկատվություն:

Գործադիրն այսօր հաստատել է նաեւ 2018-2020 թվականների պետական միջնաժամկետ ծախսերի ծրագիրը: Կարեն Կարապետյանի խոսքով՝ բավական հավակնոտ սեփական եկամուտների մուտքերի աճ եւ շատ կոշտ հաստատուն ծախսերի կառավարում են նախատեսում, ցանկանում են տնտեսված միջոցներն ուղղել դեպի տնտեսական աճ: Բավական դժվար իրագործելի հայտանիշ է, այդ պատճառով վարչապետը բոլորից առավելագույնս համակարգված աշխատանք է ակնկալում:

Խոսելով տնտեսական աճի մասին՝ ֆինանսների նախարարը նշեց, որ կառավարության եւ Կենտրոնական բանկի կանխատեսումներն այս հարցում տարբերվում են: Վարչապետը խոստացավ այդ հարցը հետո Արթուր Ջավադյանի հետ քննարկել: Կրթության ոլորտի բարեփոխումները շարունակվում են: Մասնավորապես, մինչեւ այս տարեվերջ կվերանայվեն դպրոցների խորհուրդների, տնօրենների նշանակման եւ ազատման կարգերը: Ձգտում են բացառել դպրոցներում հովանավորչության, ազգակցական կապերի, շահերի բախման երեւույթները:

«Սասնա ծռեր»-ի 18 անդամների գործով այսօրվա դատական նիստին ընդամենը 3 ամբաստանյալ էր ներկա: Մյուսների նկատմամբ դատավոր Արտուշ Գաբրիելյանը նախորդ նիստում սանկցիա էր կիրառել: Այսօրվա նիստում էլ դատավորը սանկցիա կիրառեց պաշտպաններից Լուսինե Սահակյանի եւ Երվանդ Վարոսյանի նկատմամբ: Փաստաբանները հրաժարվեցին առանց իրենց պաշտպանյալների ներկայության մասնակցել նիստին եւ լքեցին դահլիճը:

Մինչ հեռանալը, սակայն, Լուսինե Սահակյանը դատավոր Արտուշ Գաբրիելյանին ինքնաբացարկի միջնորդություն ներկայացրեց՝ նշելով, որ դատարանն անընդհատ խախտում է ամբաստանյալների եւ պաշտպանների իրավունքները: Փաստաբանը նաեւ նշեց, որ դատավորն ընդհանրապես իրավունք չունի դատական նիստեր վարել, քանի որ նրա նախագահությամբ նիստի ժամանակ դատարանի խցում «Սասնա ծռեր»-ի անդամներից մի քանիսին ոստիկանները բռնության են ենթարկել:

Ամբաստանյալներից Արամ Մանուկյանն էլ հայտարարեց, որ հրաժարվում է մասնակցել նիստին, քանի որ «Սասնա ծռեր»-ի մյուս 15 անդամները բացակայում են: Մանուկյանի հայտարարությանը միացան նաեւ Հովհաննես Հարությունյանն ու Թաթուլ Թամրազյանը, ինչից հետո լքեցին նիստերի դահլիճը: Արդյունքում դատական կարգը խախտելու համար նրանք նույնպես սանկցիայի ենթարկվեցին: Դատարանն այնուհետեւ առանց ամբաստանյալների սկսեց ինքնության ճշտման փուլը՝ նրանց մեկ առ մեկ դատարանի խցից դահլիճ բերելով: Ինքնության ճշտումից հետո ամբաստանյալներին կրկին հեռացնում էին դատարանի դահլիճից: «Սասնա ծռեր»-ի 18 անդամների գործով հաջորդ դատական նիստը հուլիսի 13-ին է:

«Կոնտինենտ Տեքս» ընկերության նախկին աշխատակիցներն այսօր հավաքվել էին կառավարության շենքի առջեւ: Դերձակները պահանջում են իրենց 8 ամսվա չվճարված աշխատավարձը: Պետական 100 տոկոս բաժնեմասով ընկերությունը լուծարվել է 2013 թվականին, բայց աշխատակիցներին մինչեւ հիմա 8 ամսվա աշխատավարձի պարտք ունի: Դերձակներն ասում են՝ դռնեդուռ ընկած իրենց վաստակած գումարն են խնդրում, բայց միայն խոստումներ են ստանում: Զարմանում են. մի՞թե ոստիկանապետը չգիտի, որ իր համազգեստը կարող դերձակները մինչեւ հիմա փող չեն ստացել:

Չլիցենզավորված եւ տուգանքները չվճարած տաքսիստներն էլ այսօր Ազգային ժողովի շենքի մոտ էին: Կառավարությունից պահանջում են զրոյացնել լիցենզավորման համար կուտակված տուգանքները: Վստահեցնում են, որ չլիցենզավորված տաքսիստների գործունեությունը 3 ամիս անց կասեցնելու մասին կառավարությունը իրենց չի ծանուցել, միտումնավոր 2-3 տարի հետո են տեղեկացնում, երբ տուգանքների չափը մեծացել է: Փոխարենը մինչեւ հիմա չեն կասեցնում որոշ տաքսի ծառայությունների ապօրինի եւ արտոնյալ պայմաններով գործունեությունը:

Հուլիսի 6-ին եվրոն թանկացել է, ռուբլին՝ էժանացել: Արդյունքում եվրոպական արժույթի փոխարժեքը կազմել է 545 դրամ, դոլարինը՝ 480, ռուբլունը՝ 7 դրամ 98 լումա, ֆունտինը՝ 622 դրամ:

Հուլիսի 7-ին հանրապետության շրջանների զգալի հատվածում սպասվում է կարճատեւ անձրեւ եւ ամպրոպ, առանձին հատվածներում հնարավոր է կարկուտ: Օդի ջերմաստիճանը 4-5 աստիճանով կնվազի: Երեւանում նույնպես առանձին հատվածներում կարճատեւ անձրեւ կլինի: Մայրաքաղաքում գիշերը կդիտվի +18+20, ցերեկը՝ +32+34 աստիճան տաքություն: