Խոշոր հրդեհ, այս անգամ մայրաքաղաքում: Ժամը 13:00-ից փրկարարները փորձում էին մարել «Նաիրիտ» գործարանի արտադրամասերից մեկում բռնկված հրդեհը: Հրդեհն այնքան մեծ էր, որ ծուխը տեսանելի էր մայրաքաղաքի գրեթե բոլոր ծայրերից: Առաջին մտահոգությունը, որ առաջ եկավ հրդեհից հետո՝ որքանով է քիմիական գործարանի հրդեհը վտանգավոր քաղաքացիների առողջության համար: ԱԻՆ-ն այս հավանականությունը միանգամից բացառեց. քաղաքացիների առողջությանը վտանգ չի սպառնում, թեեւ խորհուրդ տվեց ապահովության համար փակ պահել պատուհանները:
Այնուամենայնիվ, հրդեհը լուրջ խնդիրներ է առաջացրել հրշեջների համար: Ժամը 21:00-ի դրությամբ դեռեւս չէր հաջողվել մարել այն: Գլխավոր հարցը, թե ինչից է բռնկվել հրդեհը, դեռեւս անպատասխան է մնում: ԱԻՆ-ը մի քանի ուշագրավ վարկած ունի:
Ստեփանակերտի հոսպիտալում նախօրեին մահացել է օգոստոսի 23-ին հակառակորդի կրակոցից վիրավորված Արտակ Բիշարյանը: Պայմանագրային զինծառայողը Վազգեն Սարգսյանի անվան ռազմական ինստիտուտի սան էր, 4 տարի ծառայում էր Արցախի զինված ուժերում: 26-ամյա զինծառայողը Շիրակի մարզի Հոռոմ գյուղից, սոցիալապես անապահով ընտանիքից:
Նախորդ շաբաթ Սոչիում Սերժ Սարգսյանն ու Վլադիմիր Պուտինը Արցախում խաղաղապահների տեղակայման հարց չեն քննարկել: «Բազե» երիտասարդական հավաքի մասնակիցների հետ հանդիպմանը Սերժ Սարգսյանն անդրադարձել է այս թեմայի շուրջ քննարկումներին: Նախագահի խոսքով, հանդիպման օրակարգում խաղաղապահների հարցը չի եղել, ավելի Արցախի հարցը գրեթե չի քննարկվել:
Փոխարենը Հայաստանի եւ Ռուսաստանի նախագահները հիմնականում անդրադարձել են հայ-ռուսական հարաբերությունների տարբեր ոլորտներին: Հայաստանի արտաքին քաղաքական օրակարգում ոչ միայն Ռուսաստանի հետ հարաբերությունների զարգացումն է, այլեւ Եվրամիության հետ գործընկերությունը: Սերժ Սարգսյանը ծիծաղելի է անվանել այն խոսակցությունները, թե 2013թ.-ին, երբ Հայաստանը ԵՏՄ-ին միանալու որոշումը կայացրել է մեկ գիշերվա մեջ եւ որ դա պարտադրված որոշում է եղել: Նախագահը բացատրել է՝ ԵՏՄ-ն դեմ չէր Եվրամիության հետ Հայաստանի ասոցացման համաձայնագրին, իսկ Եվրամիությունը բացառում էր Հայաստանի անդամակցությունը Ռուսաստանի շուրջ ստեղծված տնտեսական կառույցին: Այնուամենայնիվ, Եվրամիության հետ համագործակցության էջը փակված չէ: Սերժ Սարգսյանը նույնիսկ հրապարակել է եվրոպական ընտանիքի հետ գործընկերության նոր համաձայնագրի ստորագրման ժամկետը:
Բազեականները Սերժ Սարգսյանին հետաքրքրվել են՝ ինչպիսին է տեսնում Հայաստանը 20-30 տարի հետո: Մարզերը նույնքան զարգացած կլինեն, որքան Երեւանը. Հայաստանի ապագա տեսլականն է ներկայացրել Սերժ Սարգսյանը:
Արցախի պաշտպանության նախկին նախարար Սամվել Բաբայանին այսուհետ կարող են տեսակցության գնալ ընտանիքի անդամները: Դատարանն այսօր բավարարեց Բաբայանի պաշտպանի միջնորդությունն ու հանեց տեսակցությունների արգելքը:
Սամվել Բաբայանը շարունակում է հերքել իրեն առաջադրված մեղադրանքը: Նա այսօր կրկին հայտարարել է, որ գործը սարքված է, պարզապես իրեն ձերբակալելու խնդիր է դրված եղել: Որպես ապացույց՝ նա մատնանշել է գործում առկա բացերը, օրինակ, ո՞վ է այն անձը, որը, ըստ գործի նյութերի, «Իգլան» Վրաստանից տեղափոխել է Հայաստան եւ փոխանցել իրենց: Դատական հաջորդ նիստը կկայանա մեկ շաբաթից:
Երեւանի «Շենգավիթ» բժշկական կենտրոնում 10 օրական երեխա է մահացել: Փոքրիկը ծնվել էր օգոստոսի 13-ին սրտի բնածին արատով եւ թոքերի անբավարարությամբ: Օրեր անց երեխան տեղափոխվել էր Նորքի սրտաբանական կլինիկա, որտեղ էլ օգոստոսի 22-ին մահացել էր: Կատարվածի մեջ հարազատները մեղադրում են հղիությունը հսկած բժշկուհուն՝ նշելով, որ հղիության ընթացքում անհրաժեշտ հետազոտություններ չեն արվել, ինչը թույլ կտար ձեռնարկել վաղաժամ ծննդաբերության դեպքում կատարվող անհրաժեշտ բուժումները: Նորածնի հայրը NEWS.am-ին պատմել է, որ ծննդաբերությունից հետո էլ պատշաճ բուժօգնություն չի ցուցաբերվել, ինքը ստիպված է եղել 3 օրական որդուն սեփական մեքենայով տանել այլ կլինիկա հետազոտման: Հիվանդանոցն առայժմ պաշտոնապես չի արձագանքել այս մեղադրանքին:
Դոլարի ու եվրոյի վերելքը շարունակվում է, աճել է նաեւ ռուբլու փոխարժեքը: Դոլարի փոխարժեքն օգոստոսի 28-ին կազմել է 478 դրամ, եվրոյինը՝ 571, ռուբլունը՝ 8,10 դրամ, դրամ 19 լումա, ֆունտինը՝ 617 դրամ:
Հանրապետությունում վաղվանից սպասվում է բարձր կարգի հրդեհավտանգ իրավիճակ: Օգոստոսի 29-31-ին սպասվում է առանց տեղումների եղանակ, օդի ջերմաստիճանն էապես չի փոխվի:
Մայրաքաղաքում օգոստոսի 29-ի գիշերը կդիտվի +19+21, ցերեկը՝ +34+36 աստիճան տաքություն: