Մեկնարկել է 6-րդ գումարման Ազգային ժողովի երկրորդ՝ աշնանային նստաշրջանը: Առաջին նիստին ներկա են եղել 105 պատգամավորներից 91-ը: Այս նստաշրջանի օրակարգում 30 հարց է ընդգրկված, որից 9-ը վերաբերում է միջազգային համաձայնագրերի:
Նման մի համաձայնագիր արդեն ներկայացվել է պատգամավորներին: Հայաստանն ու Իրանը համաձայնագիր են ստորագրել եւ պատրաստվում են Մեղրի-Նուրդուզ սահմանային դարպաս ստեղծել: «Ելք»-ից Նիկոլ Փաշինյանը դրական է գնահատել նախաձեռնությունը, նաեւ հայտարարել, որ կողմ են քվեարկելու: Բայց նախ ֆինանսների փոխնախարարին հարցրել է հայ-իրանական համատեղ մեկ այլ նախագծի՝ Մեղրիի ՀԷԿ-ի ճակատագրի մասին: Հիմնարկեքը նախագահի մասնակցությամբ կատարվել է 2012 թվականին, իսկ ծրագիրը պետք է ավարտին հասցնեին հինգ տարվա ընթացքում: Վախթանգ Միրումյանը նախագծի ընթացքի մասին ոչինչ ասել չի կարողացել: Հարցը Փաշինյանն ուղղել է նաեւ Գագիկ Մելիքյանին: Նա նույնպես անորոշ է պատասխանել. շինարարության հետ կապված բանակցություններն ընթանում են: Սրան Փաշինյանն արձագանքել է «Կարգին հաղորդում»-ից մեջբերումով:
Իսկ ելույթում Փաշինյանը հիշեցրել է հայ-իրանական մի շարք նախագծերի մասին եւ արձանագրել, որ դրանք, ըստ էության, ձախողվել են. Մեղրիի ՀԷԿ, գազի տարանցում, նավթի վերամշակման համատեղ ձեռնարկություն, Իրան-Հայաստան երկաթուղի: Հիմա արդեն պատգամավորը կասկածում է, որ նոր ծրագիրը հաջողություն կունենա:
«Միջազգային գիտատեխնիկական կենտրոնի գործունեությունը շարունակելու մասին» համաձայնագրի վավերացման հարցի քննարկման ժամանակ Նաիրա Զոհրաբյանը հետաքրքրվել է, թե ինչ չափորոշիչներ են սահմանվում գիտական դրամաշնորհների տրամադրման հարցում: Դժգոհել է, որ «էլիտար գիտնականները կաստա են ստեղծել» եւ երիտասարդներին չի հաջողվում ճեղքել պատնեշը: Սամվել Հարությունյանը վստահեցրել է, որ Միջազգային գիտատեխնիկական կենտրոնում բոլոր գիտական նախագծերը մանրամասն քննարկում են:
Խորհրդարանի միջանցքում լրագրողները զրուցել են առաջին նիստին Գագիկ Ծառուկյանի հետ: Նա, ի դեպ, խոստացել է, որ այս նստաշրջանում իրեն ավելի հաճախ կտեսնեն խորհրդարանում: «Ծառուկյան» դաշինքի ղեկավարին հարցրել են, որ եթե ՀՀԿ-ն 2018 թվականի ապրիլից հետո վարչապետի պաշտոնում առաջադրի Սերժ Սարգսյանին, արդյո՞ք իր համար ընդունելի թեկնածու կլինի: Պատասխանել է, որ «եթե»-ներով խոսել չի ուզում, երբ կառաջադրեն, այն ժամանակ էլ կարծիք կհայտնի:
Գործող վարչապետի գործունեությանը գնահատական տալը Ծառուկյանը կոռեկտ չի համարում: Ասել է՝ Կարապետյանն իր ընկերն է, խնդիրների մասին անձամբ նրա հետ է խոսում: Բայց մի քանի դրական առաջընթացի մասին, ամեն դեպքում, խոսել է: Իսկ եթե խորհրդարանական ընտրություններում ժողովուրդն իրենց 50+1 ձայն տար, «Ծառուկյան» դաշինքը կկատարեր նախընտրական բոլոր խոստումները, այդ թվում՝ 15 մլրդ դոլարի ներդրումները:
Ադրբեջանի նախագահ Իլհամ Ալիեւը ներում է շնորհել բլոգեր Ալեքսանդր Լապշինին: Բլոգերին արտահանձնելու են Թել Ավիվին. արտգործնախարարությունն ու Բաքվում Իսրայելի դեսպանատունն արդեն համապատասխան փաստաթղթերն են նախապատրաստում: Մինչ այդ, սակայն, Լապշինը մեկուսարանում ինքնասպանության փորձ է արել, վերակացուները հասցրել են կանխել: Լապշինն այժմ բժիշկների հսկողության ներքո է: Ադրբեջանի հարցմամբ բլոգերը ձերբակալվել էր 2016 թվականին Մինսկում եւ արտահանձնվել Բաքվին: Ադրբեջանը նրան «սեւ ցուցակում» էր ընդգրկել առանց իր համաձայնության Արցախ այցելելու համար: Բաքվի դատարանն Ալեքսանդր Լապշինին 3 տարվա ազատազրկման է դատապարտել:
Միխայիլ Սահակաշվիլին սեպտեմբերի 10-ի երեկոյան հատել է Ուկրաինայի սահմանը: Վրաստանի նախկին նախագահի կողմնակիցներն ուկրաինական կողմում ճեղքել են սահմանապահների շղթան եւ Սահակաշվիլիին շրջապատած անցկացրել սահմանը: Ուկրաինայի իշխանությունները հայտարարել են, որ նա ապօրինի է հատել ուկրաինա-լեհական սահմանը: Քրեական գործ է հարուցվել: Սահակաշվիլին էլ ուկրաինացի սահմանապահներին մեղադրել է իր «անձնագիրը հափշտակելու» մեջ: Իսկ Օդեսայի նախկին նահանգապետի փաստաբաններն արդեն խնդրում են թույլ չտալ, որ իրենց պաշտպանյալին Վրաստան արտաքսեն: Հիշեցնենք, որ հայրենիքում Սահակաշվիլիի դեմ քրեական գործեր կան հարուցված: Միխայիլ Սահակաշվիլին Ուկրաինայի քաղաքացիություն էր ստացել 2015 թվականին մայիսին, իսկ այս տարվա հուլիսին նախագահ Պյոտր Պորոշենկոյի հրամանագրով զրկվել է քաղաքացիությունից:
«Վերնիսաժի» առեւտրականները, որոնք աշխատում են Բուզանդ փողոցին հարող տարածքում, այսօր քաղաքապետարանում էին: Անցյալ հանգստյան օրերին նրանց արգելել են այդ տարածքում առեւտուր անել: Ավելի քան երեք ժամ սպասելուց հետո նրանց ընդունել է փոխքաղաքապետ Դավիթ Օհանյանը: Պաշտոնյան հիշեցրել է, որ դեռ տարիներ առաջ էին զգուշացրել. շուկան վերանորոգելուց հետո Արամի եւ Բուզանդի փողոցները «մաքրելու» են առեւտրականներին: Չնայած դրան՝ քաղաքապետարանի ներկայացուցիչը խոստացել է խնդիրը քննարկել վարձակալի հետ, սակայն նրա խոսքում որեւէ հստակություն չի եղել: Այս հանգստյան օրերին առեւտրականներին թույլ կտա՞ն աշխատել Բուզանդի փողոցում. հարցը Դավիթ Օհանյանն անպատասխան է թողել: Քաղաքապետարանի միջնորդության մասին հարցին փոխքաղաքապետը ստիպված է եղել արձագանքել: Մի քանի տասնյակ առեւտրականներ քաղաքապետարանից հեռացել են՝ առանց իրենց հարցի լուծման: Նրանք նաեւ նամակ են փոխանցել վարչապետ Կարեն Կարապետյանին, հույս ունեն, որ գոնե կառավարությունից կստանան իրենց խնդրի պատասխանը:
Արմավիրի մարզում առեղծվածային դեպք է տեղի ունեցել: Խորոնք գյուղի տներից մեկում, դեռեւս անհայտ պատճառներով, ուժեղ պայթյուն է որոտացել: Տան պատերը փլուզվել են, պատուհաններն ու դռները՝ կոտրվել, գույքը՝ վնասվել: Պայթյունի պահին տան հյուրասենյակում եղել է 15-ամյա Արտակ Ամիրյանը. բարեբախտաբար, նա չի տուժել: Ընտանիքի մյուս անդամները դաշտում զբաղված են եղել գյուղատնտեսական աշխատանքներով: Առայժմ հայտնի չէ, թե ինչն է եղել պայթյունի պատճառը: Պատահարի պատճառները պարզելու համար մի շարք փորձաքննություններ են նշանակվել:
Չարենցավանի Արգելի ՀԷԿ-ի ջրամբարում շարունակում են որոնել Սոլակ գյուղի 27-ամյա բնակիչ Անժելա Մ.-ի դին: Նրա անհետանալու մասին ահազանգը ստացվել է սեպտեմբերի 10-ի երեկոյան: Ավելի ուշ ջրամբարի մոտակայքում գտել են երիտասարդ կնոջ հողաթափերը, իսկ ջրամբարում՝ գլխարկը: Հարազատներն իրավապահներին ասել են, որ աղջիկն առողջական խնդիրներ ունի եւ բազմիցս հայտարարել է ինքնասպանություն գործելու մտադրության մասին:
Սեպտեմբերի 11-ին դոլարը կայուն է եղել, իսկ եվրոն կտրուկ աճից հետո ավելի քան 2 դրամով էժանացել է: Դոլարի փոխարժեքն արդյունքում կազմել է 478 դրամ, եվրոյինը՝ 574, ռուբլունը՝ 8 դրամ 37 լումա, բրիտանական ֆունտինը՝ 631 դրամ:
Սեպտեմբերի 12-16-ը հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +18+20, ցերեկը՝ +34+36 աստիճան տաքություն: