Էջմիածնում գիշերը կրակոցներ են հնչել. 2 անձ է սպանվել: Միջադեպի վայրում կրակոցի հետքերով վնասված «Տոյոտա» մակնիշի ավտոմեքենա է հայտնաբերվել: Քննչական կոմիտեի տվյալներով՝ սպանվածներն Արմավիրի բնակիչներ են՝ 44-ամյա Կարեն Դավթյանը եւ 36-ամյա Լեւոն Ավետիսյանը: Մեր տեղեկություններով՝ Կարեն Դավթյանը քրեական աշխարհում հայտնի «Տուպիկ Կարենն» է, Ավետիսյանը՝ նրա վարորդը: Էջմիածինցիները վստահ են, որ տեղի ունեցածը քրեական հեղինակությունների միջեւ «ռազբորկա» է: Միջադեպը կապում են քրեական հեղինակություն Արթուր Ասատրյանի՝ Դոն Պիպոյի դեմ մահափորձի հետ:

Ազգային ժողովի այսօրվա նիստը սկսվել է նախօրեին քննարկված օրինագծերի քվեարկությամբ: Հենց առաջին քվեարկության ժամանակ Նիկոլ Փաշինյանը խախտում է արձանագրել: Իսկ այսօր բուռն քննարկման առարկա է դարձել Երեւանում տեղական ինքնակառավարման մասին օրենքում փոփոխությունների նախագիծը: Դրանով առաջարկվում է հանրաքվե նախաձեռնելու իրավունքը տալ միայն Երեւանի քաղաքապետին եւ ավագանու 1/3-րդին, թեեւ նախկինում նման հնարավորություն ուներ նաեւ խմբակցությունը: Նիկոլ Փաշինյանը սրանում ավագանու խմբակցությունների իրավունքները սահմանափակելու միտում է տեսնում:

Փոփոխություններ են կատարվելու նաեւ «Քաղաքական ապաստանի մասին» օրենքում: Սա պայմանավորված է նոր Սահմանադրությամբ: Նախկինում քաղաքական ապաստան տալու համար դիմում էին նախագահին, հիմա հարցով կզբաղվի հատուկ մարմինը: «Ծառուկյան» խմբակցության պատգամավորներին հետաքրքրել է, թե մինչեւ հիմա քանի մարդ է դիմել Հայաստանում քաղաքական ապաստան ստանալու համար: Վաչե Տերտերյանը հայտնել է՝ ոչ ոք:

«Ծառուկյան» խմբակցությունից մեկ այլ պատգամավոր՝ Գեւորգ Պետրոսյանը դեմ է Քաղաքացիական օրենսգրքում հարեւանության իրավունքի ներդրմանը: Մտավախություն ունի, որ դա կհանգեցնի հարեւանների միջեւ «մեծ կռիվների, անգամ մարդասպանության»:

Երեւանի ավագանու նիստն այսօր թեժ մթնոլորտում է անցել: Նիստի հենց սկզբում ավագանու Հանրապետական եւ «Ելք» խմբակցությունների անդամները վիճաբանել ու անձնական վիրավորանքների են անցել: Պատճառը հանրապետականների անպարկեշտ ռեպլիկներն են եղել Անահիտ Բախշյանի հասցեին: «Ծիտ» մականունով հայտնի հանրապետական Արմեն Սահակյանը Բաշխյանին դիմել է «պարոն»-ով եւ «Անո»-ով: «Ելք»-ի անդամները փորձել են կարգի հրավիրել Սահակյանին, ինչը լեզվակռվի է վերածվել:

Հետո էլ կրքեր են բորբոքվել ավագանու ընդդիմադիր խմբակցությունների միջեւ: Այս դեպքում էլ պատճառն Էլցանցերին հողատարածք տրամարդելու օրակարգային հարցն է եղել: «Երկիր Ծիրանի»-ի անդամները փորձել են հասկանալ, թե ինչպես է օգտագործվելու այդ հողատարածքը: Նրանց հարցադրումների արդյունքում «Ելք»-ի անդամների նյարդերը տեղի են տվել. նրանք խորհուրդ են տվել ըստ էության քննարկել հարցերը: «Երկիր Ծիրանի»-ն էլ առիթը բաց չի թողել ու «Ելք»-ին եւս մեկ անգամ մեղադրել է իշխանությանը ծառայելու մեջ:

Ի դեպ՝ «Երկիր Ծիրանի» խմբակցության մասին. Հայկ Պետրոսյանն ու Մնացական Պարակշիեւը վերջնականապես լքել են խմբակցությունը: Իսկ նիստում «Երկիր Ծիրանի»-ի պահվածքը, պարզվում է, զվարճացրել է քաղաքապետին:

Ինչ վերաբերում է հանրապետականների վարքագծին. Տարոն Մարգարյանն ասել է՝ ավագանու անդամներին հորդորել է հարգել միմյանց: Մայրաքաղաքում վերջերս տիրող, մեղմ ասած, հակասանիտարական վիճակն էլ Տարոն Մարգարյանն այսպես է բացատրել. «Սանիթեք»-ը մեքենաների հետ կապված խնդիրներ է ունեցել, հիմա իրավիճակը կարգավորվել է, առաջիկայում քաղաքը նորից մաքուր կլինի: Իսկ փողոցներում տիրող գարշահոտության պատճառը ձմերուկի եւ սեխի հանդեպ հայերի մեծ սերն է:

«Իրմա» փոթորիկն ամերիկյան Ֆլորիդայում արդեն 5 մարդու կյանք է խլել: Նահանգում 6.5 մլն մարդ զրկվել է էլեկտրականությունից, հարյուր հազարավորներն անօթեւան են մնացել: Մոլեգնող փոթորկի պատճառով նահանգում փակվել են պետական եւ ուսումնական հաստատությունները: «Իրմա»-ն աղետալի վնասներ է հասցրել նաեւ Կարիբյան ավազանի երկրներին. այստեղ 27 մարդ է զոհվել: Վտանգավորության չորրորդ աստիճանի հասած փոթորիկը թուլացել է եւ շարժվում է արեւմտյան ափամերձ շրջաններով: Տարերքն ընդգրկել է նաեւ ամերիկյան այլ նահանգներ՝ Ալաբամա, Ջորջիա, Հարավային Կարոլինա եւ Հյուսիսային Կարոլինա: Գիտնականներն ԱՄՆ-ում մոլեգնող փոթորիկների հնարավոր պատճառ են համարում տաքացող Արկտիկան: Այստեղ արդեն նաեւ վնասի չափ են հաշվարկում. դրանց համաձայն՝ «Հարվի» եւ «Իրմա» փոթորիկներն ամերիկյան տնտեսությանը 290 մլրդ դոլար կարժենան:

Սեպտեմբերի 12-ին դոլարը թանկացել է, իսկ եվրոն շարունակում է թուլանալ: Դոլարի փոխարժեքն արդյունքում կազմել է 478 դրամ, եվրոյինը՝ 572, ռուբլունը՝ 8 դրամ 32 լումա, բրիտանական ֆունտինը՝ 634 դրամ:

Սեպտեմբերի 13-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի, բարձր հրդեհավտանգ իրավիճակը կպահպանվի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +18+20, ցերեկը՝ +33+35 աստիճան տաքություն: