Հայկական կողմը կարող է ազդել կոռուպցիոն սկանդալի գործով Ադրբեջանի նկատմամբ հետաքննության ընթացքի եւ արագության վրա։ NEWS.am-ի թղթակցի հետ զրույցում նման կարծիք հայտնեց փորձագետ Ստեփան Սաֆարյանը՝ մեկնաբանելով փողեր լվանալու եւ եվրոպացի պատգամավորներին կաշառելու հետ կապված Ադրբեջանի շուրջ ծավալված սկանդալը։

Սակայն փորձագետը կողմը կասկած հայտնեց, որ հայկական կողմը՝ մասնավորապես ԱԳՆ-ն, կզբաղվի դրանով։ «Իհարկե, նրանք կարող են։ Բայց արդյոք որեւէ բան կձեռնարկե՞ն։ Չեմ կարծում։ Ներեցեք, բայց հայկական դիվանագիտության վերաբերյալ ես չէի ցանկանա մեկնաբանություններ տալ, քանի որ այն ինչ-որ բան ձեռնարկելու ընդունակ չէ, եւ ես նրանից պարզապես սպասելիքներ չունեմ»,-ասաց փորձագետը։

Միաժամանակ մեկնաբանելով սկանդալի հետ կապված ադրբեջանական կողմի պաշտոնական դիրքորոշումը, որ Բաքուն կրկին «կարողացել է» ամեն ինչում «հայկական հետք» տեսնել՝ Ստեփան Սաֆարյանն արձանագրեց, որ նման հայտարարություններով Ադրբեջանի իշխանությունները փորձում են իրենց մեղավորությունը հերքել՝ հայկական կողմին որպես չարիք ներկայացնելով եւ դրանով հանդերձ էլ ավելի վախեցնելով սեփական հասարակությանը։

Հիշեցնենք, որ Guardian-ի տվյալներով՝ Ադրբեջանի իշխող վերնախավը ավելի քան 16 հազար վճարումներ է իրականացրել 2012-2014 թթ։ Այդ գումարների որոշ մասը վճարվել է քաղաքական գործիչների ու լրագրողների՝ Ադրբեջանի իշխանությունների հասցեին քննադատությունները նվազեցնելու ու երկրի համար դրական վարկանիշ ստեղծելու համար։

Ըստ պարբերականի՝ Ադրբեջանի իշխանությունները գաղտնի սխեմայի միջոցով 2․9 մլրդ դոլար են «լվացել» բրիտանական կեղծ ընկերությունների միջոցով։ Բանկային փաստաթղթերը փոխանցվել են դանիական Berlingske թերթին, OCCRP կազմակերպությանը, Guardian –ին։