Թուրքիայում սկսվել է թուրքական Zaman ընդդիմադիր թերթի ավելի քան 30 աշխատակիցների դեմ դատական գործընթացը։ Թերթի լրագրողներին եւ խմբագիրներին մեղադրում են կառավարությունը եւ խորհրդարանը տապալելու փորձի մեջ, հայտնում է Anadolu–ն։ Նրանց մեղադրում են նաեւ Ֆեթուլլահ Գյուլենի «ահաբեկչական շարժման» հետ կապերի մեջ, որին Անկարան 2016-ի հուլիսի պետական հեղաշրջման փորձի կազմակերպիչն է համարում։
Դատական գործընթացն ընթանալու է Սիլիվրի բանտի դիմաց գտնվող դատարանում։ Գործի ֆիգուրանտ հանդիսացող 22 մարդ կալանքի տակ են։ Նրանց թվում են թերթի տեսաբաններ Մումթազար Թյուրքոնը եւ Սահին Ալփայը։ Մյուս մեղադրյալները երկիրը չլքելու ստորագրությամբ ազատ են արձակվել կամ թաքնվում են արտասահմանում։ Եթե նրանց մեղքն ապացուցվի, նրանց երկարատեւ ազատազրկում է սպառնում։