Երեւանում կրկին կրակոցներ են հնչել: Դեպքը տեղի է ունեցել Մամիկոնյանց փողոցում: Իրավապահները դեպքի վայրում մի քանի կրակված պարկուճ, ինչպես նաեւ Hyundai եւ Nissan մակնիշների մեքենաներ են հայտնաբերել՝ ձեռքի եւ ոտքի հարվածի հետքերով: Միջադեպի հետեւանքով զոհեր չկան: Պարզվել է, որ վիճաբանություն է տեղի ունեցել, որի մասնակիցներից մեկը գազային ատրճանակ է կիրառել: Վիճաբանության մասնակիցների ինքնությունը պարզվել է, ոստիկանությունը որոնում է նրանց:
Վերնիսաժի մոտ՝ Թուֆենկյան հյուրանոցի հարեւանությամբ տեղի ունեցած աղմկահարույց սպանության գործով կալանավորված Ռաֆիկ Խաչատրյանն արդեն ցուցմունք է տվել: Նա մասնակի է ընդունել իրեն առաջադրված մեղադրանքը: Փաստաբան Մարինե Ֆարմանյանի խոսքով՝ իր պաշտպանյալը չի ընդունել սպանության մեղադրանքը՝ նշելով, որ ինքը միայն մասնակցել է միջադեպին: Ֆարմանյանը նաեւ պատրաստվում է բողոքարկել որպես խափանման միջոց կալանքն ընտրելու՝ դատարանի որոշումը: Հայտնի է նաեւ, որ 60-ամյա Խաչատրյանը Թուֆենկյան հյուրանոցի շինարարներից է եղել: Հետո Խաչատրյանը տաքսի է վարել, այդ ընթացքում էլ ծանոթացել է գործով մյուս կասկածյալների՝ 35-ամյա Ալբերտ Բլբուլյանի եւ 33-ամյա Արմեն Կարադավիդովի հետ: Նրանց դեռեւս որոնում են: Հիշեցնենք, որ սեպտեմբերի 14-ին տեղի ունեցած միջադեպի հետեւանքով սպանվել է 43-ամյա Գարիկ Մոսինյանը, վիրավորվել՝ 39-ամյա Վահագն Աբգարյանը: Երկուսն էլ Ալավերդիից են, քրեական աշխարհի ներկայացուցիչներ:
Հայաստանում մսի գների լուրջ աճ է գրանցվել: Մասնավորապես՝ խոզի մսի գինն աճել է 38-41 տոկոսով: Հայրենական արտադրողների միության նախագահի տվյալներով՝ թանկացել են նաեւ կարագը, կաթնամթերքը, ձուկը, ինչպես նաեւ որոշ ծառայություններ, օրինակ՝ ավիափոխադրումը: Վազգեն Սաֆարյանն ավիատոմսերի աննախադեպ թանկացումը կապում է արձակուրդային սեզոնի հետ: Նրա խոսքով՝ Հայաստանը սեփական ավիաընկերություն չունի, որը կկարողանար մրցակցել օտարերկրյա ընկերությունների հետ, արտասահմանյան ավիափոխադրողներն էլ ակտիվորեն օգտվում են ազատ մրցակցությունից:
Հանրապետությունում թանկացել է նաեւ բենզինը. սա էլ Վազգեն Սաֆարյանը կապում է վառելիքի միջազգային շուկայում տիրող իրավիճակի հետ: Տնտեսական մրցակցության պաշտպանության հանձնաժողովն արդեն տեղեկատվություն է պահանջել ոլորտում գերիշխող դիրք զբաղեցնող տնտեսվարողներից, կուսումնասիրի նաեւ վառելիքի միջազգային շուկան եւ կգնահատի գնաճի հիմնավորվածությունը:
Իրաքյան Քուրդիստանում անկախության հանրաքվեն կայացել է, չնայած Իրաքի կենտրոնական իշխանություններն ու բազմաթիվ երկրներ դեմ էին արտահայտվել հանրաքվեի անցկացմանը: Ընտրողների բարձր ակտիվության պատճառով որոշ տեղամասերում քվեարկությունը մեկ ժամով երկարաձգվել է: Հանրաքվեին շուրջ 3.3 միլիոն մարդ է մասնակցել՝ ընտրելու իրավունք ունեցողների 72.16%-ը: Առայժմ հաշվարկվել է քվեարթերթիկների 9%-ը, որի արդյունքներով՝ ընտրողների ավելի քան 93%-ը կողմ է արտահայտվել ինքնավար շրջանի անկախացմանը: Տվյալների ամփոփումից հետո, սակայն, պատկերը կարող է փոխվել: Հանրաքվեի վերջնական արդյունքները նախատեսում են հրապարակել
Մինչ այդ, սակայն, փորձագիտական շրջանակները խոսում են այն մասին, որ հանրաքվեի արդյունքում շրջանում անկայունության աճ կգրանցվի՝ բարդացնելով ինքնավարության բնակիչների վիճակը: Նշենք, որ Իրաքում քրդերը բնակվում են հիմնականում Դահուք, Սուլեյմանիա եւ Էրբիլ նահանգներում: Իրաքյան Քուրդիստանը երկրի կազմում լայն ինքնավարություն ունի, որը նույնիսկ ամրագրված է Իրաքի Սահմանադրությամբ: Իրաքյան քրդերն անկախության հանրաքվե էին նախաձեռնել դեռեւս 2014 թվականին, սակայն տեղական եւ դաշնային կառավարությունների տարաձայնությունների պատճառով այն հետաձգվեց: Անկախության համար պայքարի նոր խթան դարձավ ԻՊ-ի ներխուժումն Իրաքի հյուսիսային շրջաններ, երբ պաշտոնական Բաղդադի զինված ուժերը հեռացան, իսկ քրդական փեշմերգան փաստացի վերահսկողություն հաստատեց շրջանում:
Սոցցանցերում ակտիվորեն քննարկում են «Եվրատեսիլ 2017»-ի հաղթող Սալվադոր Սոբրալի առողջական վիճակը: Երկրպագուներն իրենց աջակցությունն են հայտնում պորտուգալացի երաժշտին: Օրերս Սոբրալը ստիպված է եղել հայտարարել ժամանակավորապես բեմից հեռանալու մասին եւ չեղարկել մինչեւ տարեվերջ ծրագրված բոլոր համերգները: Պորտուգալացին սրտի արատ ունի, այժմ նա հիվանդանոցի վերակենդանացման բաժանմունքում է, միացված սրտի աշխատանքը խթանող սարքի: Բժիշկները երգչի վիճակը ծանր են գնահատում եւ նշում, որ նրան անհապաղ սրտի փոխպատվաստում է անհրաժեշտ: Մինչեւ տարեվերջ պետք է կարողանան Սալվադորի համար սրտի դոնոր գտնել:
Սեպտեմբերի 26-ին դոլարը փոքր-ինչ թանկացել է, իսկ եվրոն շարունակել է արժեզրկվել: Դոլարի փոխարժեքն արդյունքում կազմել է 478 դրամ, եվրոյինը՝ 564, ֆունտինը՝ 643 դրամ, ռուբլունը՝ 8 դրամ 30 լումա:
Սեպտեմբերի 27-30-ը հանրապետությունում սպասվում է կարճատեւ անձրեւ եւ ամպրոպ: Օդի ջերմաստիճանն այդ ընթացքում 6-8 աստիճանով կնվազի: Երեւանում նույնպես տեղումներ կլինեն: Մայրաքաղաքում գիշերը կդիտվի +13+15, ցերեկը՝ +26+28 աստիճան տաքություն: