Դերասան եւ ռեժիսոր Արմեն Ջիգարխանյանը ոստիկանություն է դիմել՝ հայտարարելով իր անձնագրի գողության մասին: Նրա խոսքով՝ փաստաթղթերը կարող էին գողանալ հոկտեմբերի 1-ից 10-ն ընկած ժամանակահատվածում Լոմոնոսովի պողոտայում գտնվող սեփական թատրոնից, հայտնում է «НТВ»-ն:
Նախօրեին 86-ամյա Ջիգարխանյանը հիվանդանոցից դուրս է գրվել, որտեղ հոկտեմբերի 10-ին կնոջ՝ 38-ամյա Վիտալինա Ցիմբալյուկ Ռոմանովսկայայի հետ հերթական վեճից հետո տեղափոխվել էր միջին ծանր վիճակով: Հիվանդանոցից դուրս գրվելուց անմիջապես հետո դերասանը դատարան է գնացել եւ ապահարզանի դիմում տվել: Ջիգարխանյանի խոսքով՝ երիտասարդ կինն իրեն կողոպտել է եւ ավելին՝ փորձել է սպանել:
Ավելի վաղ լրատվամիջոցները հայտնել էին, որ Ջիգարխանյանը Ցիմբալյուկ Ռոմանովսկայային է կտակել իր ամբողջ կարողությունը: Ըստ որում՝ կտակի բնօրինակը տանից անհետացել է: Դերասանի ընկերները հայտարարում են, որ «երիտասարդ կինը յուրացրել է» նրա ամբողջ կարողությունը:
Հարցազրույցում դերասանն իր կնոջը «ֆանտաստիկ գող» եւ «նողկալի մարդ» է անվանել: Ջիգարխանյանը պնդում է, որ Վիտալինան յուրացրել է իր ժառանգությունը՝ բնակարանները, փողերը եւ նույնիսկ թատրոնը, որն ինքը հիմնադրել է դեռեւս 20 տարի առաջ, եւ որն իր անունն է կրում: Հայտնի է, որ Ցիմբալյուկ Ռոմանովսկայան թատրոնի տնօրենն էր եւ վերջերս ազատվել է սեփական ցանկությամբ: