Երեւանում այսօր հիշատակել են հոկտեմբերի 27-ի զոհերին: Զոհվածների հարազատները, պետական, քաղաքական գործիչներ նրանց հիշատակը հարգել են Եռաբլուրում եւ Ազգային ժողովի բակում տեղադրված հուշարձանի մոտ: Հիշեցնենք, որ 1999 թվականի այս օրը ոճրագործների խումբը` Նաիրի Հունանյանի գլխավորությամբ, ներխուժեց Ազգային ժողովի նիստերի դահլիճ եւ դիմահար կրակոցներով սպանեց կառավարության եւ խորհրդարանի անդամներին: Ահաբեկչության զոհ դարձան վարչապետ Վազգեն Սարգսյանը, խորհրդարանի նախագահ Կարեն Դեմիրճյանը, ԱԺ փոխնախագահներ Յուրի Բախշյանն ու Ռուբեն Միրոյանը, խորհրդարանի պատգամավորներ Արմենակ Արմենակյանը, Հենրիկ Աբրահամյանը, Միքայել Քոթանյանը, օպերատիվ հարցերի նախարար Լեոնարդ Պետրոսյանը: 2001 թվականին մեկնարկած գործով դատավարությունը տեւեց մինչեւ 2003 թվականը: 6 ահաբեկիչները՝ Նաիրի եւ Կարեն Հունանյաններ, Վռամ Գալստյան, Դերենիկ Բեջանյան, Էդիկ Գրիգորյան եւ Աշոտ Կնյազյան, դատապարտվեցին ցմահ, Համլետ Ստեփանյանը՝ 14 տարվա ազատազրկման: 3 տարի տեւած դատավարության արդյունքում, սակայն, այդպես էլ չբացահայտվեցին ահաբեկչության կազմակերպիչները:
Ազգային ժողովի այսօրվա նիստի մեկնարկին պատգամավորները մեկ րոպե լռությամբ հարգել են հոկտեմբերի 27-ի զոհերի հիշատակը: Այնուհետեւ մեկնարկել է նախորդ օրը քննարկված օրինագծերի շուրջ քվեարկությունը: Խորհրդարանն առաջին ընթերցմամբ ընդունել է նաեւ «Զինվորական ծառայության եւ զինծառայողի կարգավիճակի մասին» վիճահարույց օրենքի նախագիծը: Այն ընդունվել է 89 կողմ եւ 9 դեմ ձայնով: Դեմ է քվեարկել «Ելք» խմբակցությունը, իսկ Նիկոլ Փաշինյանը եւս մեկ անգամ ներկայացրել է իրենց դիրքորոշումը:
Երեկ խորհրդարանում քննարկումներից հետո պաշտպանության նախարարը ծավալուն ելույթ էր ունեցել՝ անվանապես պատասխանելով «Ելք»-ի պատգամավորների հայտարարություններին եւ դիրքորոշմանը: Այսօր «Ելք» խմբակցության անդամները որոշել են պատասխանել Վիգեն Սարգսյանին՝ նրան մեղադրելով լուրջ քննարկումից անձերին անցնելու մեջ: Ի դեպ՝ Վիգեն Սարգսյանն այսօր եւս խոսել է Արարատ Միրզոյանի մասին՝ նշելով, որ պատգամավորն ուսանողներին ակտիվորեն հրահրել է դասադուլ անել:
Նոյեմբերի 5-ին մի շարք համայնքներում կայանալիք ՏԻՄ ընտրություններին իշխող Հանրապետական կուսակցությունն ամենամեծ թվով թեկնածուներն է առաջադրել: Ընտրությունների թեման քննարկվել է ՀՀԿ-ի գործադիր մարմնի նիստում: Այստեղ հույս ունեն ընտրությունների արդյունքում ավելացնել հանրապետական համայնքապետերի եւ ավագանու անդամների թիվը: Նիստից հետո կայացած ճեպազրույցում Էդուարդ Շարմազանովին դարձյալ հարցրել են, թե 2018 թվականի ապրիլից հետո ո՞վ է լինելու Հայաստանի վարչապետը: Լուրեր են շրջանառվում, որ վարչապետ է դառնալու Սերժ Սարգսյանը, իսկ Կարեն Կարապետյանը կլինի առաջին փոխվարչապետը:
Կատալոնիայի խորհրդարանը գաղտնի քվեարկությամբ հայտարարել է Իսպանիայից շրջանի միակողմանի անջատման մասին: Որոշմանը կողմ է քվեարկել 72 պատգամավոր, դեմ՝ 10-ը: Ընդդիմադիրները քվեարկությանը չեն մասնակցել. դրա մեկնարկից առաջ նրանք լքել են նիստերի դահլիճը: Քվեարկությունից րոպեներ անց Իսպանիայի վարչապետ Մարիանո Ռախոյը հայտարարել է, որ օրենքի գերակայությամբ կհաջողվի վերականգնել օրինականությունը Կատալոնիայում: Իսպանիայի Սենատն էլ այսօր կողմ է քվեարկել Կատալոնիայի կառավարությանը լիազորություններից զրկելուն: Առաջնորդվելով Սահմանադրության 155 հոդվածով՝ նախատեսվում է Կատալոնիայի շրջանային կառավարության եւ խորհրդարանի լուծարում: Իսպանիայի կենտրոնական իշխանության որոշումը կարող է ուժի մեջ մտնել հոկտեմբերի 28-ին:
Իսրայելը Շառլ Ազնավուրին եւ նրա քրոջը՝ Աիդային պարգեւատրել է շվեդ դիվանագետ Ռաուլ Վալենբերգի անվան մեդալով: Պարգեւատրման արարողության ժամանակ Ազնավուրն Իսրայելի նախագահին հարցրել է՝ ի վերջո ե՞րբ է այդ երկիրը ճանաչելու Հայոց ցեղասպանությունը: Ռոուվեն Ռիվլինը դա քաղաքական հարց է որակել՝ հիշեցնելով, որ Կնեսետում պարբերաբար բարձրացվում է այդ հարցը: Ռիվլինն ափսոսանք է հայտնել, որ Իսրայելի կառավարությունն այդպես էլ չկարողացավ տեղի ունեցածը ճանաչել որպես Ցեղասպանություն. խնդիրը, ըստ նրա, ձեւակերպման մեջ է: Հավելենք, որ Վալենբերգի միջազգային հիմնադրամն Ազնավուրյաններին պարգեւատրել է՝ երկրորդ համաշխարհային տարիներին Փարիզում, սեփական կյանքը վտանգելով, հրեաներին ապաստան տրամադրելու համար:
Երեւանի կենտրոնում այսօր շարժիչների վերանորոգման արհեստանոցում խոշոր հրդեհ է բռնկվել, որը տարածվել է հարեւանությամբ գործող բենզալցակայանում եւ շինանյութի խանութում: Հրդեհի պատճառ է դարձել էլեկտրական սղոցը: Արհեստանոցի աշխատակիցներն էլեկտրական սղոց են վերանորոգել, վրան բենզին քսել եւ փորձարկել, սակայն սղոցը սկսել է այրվել: Աշխատակիցներն այն գետնին են գցել եւ դուրս վազել արհեստանոցից, իսկ կրակը տարածվել է եւ հասել բենզալցակայանին: Հրդեհի հետեւանքով արհեստանոցն ամբողջությամբ այրվել է, վնասվել են նաեւ բենզալցակայանն ու շինանյութի խանութը: Բարեբախտաբար, կրակը չի հասել հարեւան բնակելի շենքերին:
Հոկտեմբերի 27-ին դոլարը կայուն է եղել, իսկ եվրոն էժանացել է ավելի քան 8 դրամով: Դոլարի փոխարժեքն արդյունքում կազմել է 482 դրամ, եվրոյինը՝ 561, ռուբլունը՝ 8 դրամ 30 լումա, ֆունտինը՝ 631 դրամ:
Հոկտեմբերի 28-ին՝ օրվա երկրորդ կեսին եւ 29-ի գիշերը հանրապետության շրջանների մեծ մասում սպասվում է անձրեւ եւ ամպրոպ: Օդի ջերմաստիճանը 2-3 աստիճանով կնվազի: Երեւանում նույնպես վաղը օրվա երկրորդ կեսին տեղումներ կլինեն: Մայրաքաղաքում գիշերը կդիտվի +8+10, ցերեկը՝ +19+21 աստիճան տաքություն: